Amalunga enhlanganiso yabathengisa ezitaladini eyeNational Vendors’ Union of Zimbabwe alitshumi lesithupha abotshwe ngeviki edluleyo ngemva kokuqhamuka kodlakela phakathi kwawo lamapholisa kamanisipala eHarare, ngoLwesithathu aphikise emthethwandaba ophezulu isinqumo somthethwandaba kamantshi esokuthi bengakhululwa ngemali yesibambiso se bail.
Umthethwandaba uthe bengakhululwa bazakhuthaza abanye babo ukuthi bengavumi ukususwa lapho abathengisela khona enzikini yedolobho besiya lapho ikhansili efuna bayethengisela khona ngokusemthethweni.
Amagqwetha eZimbabwe Lawyers for Human Rights abamelayo athi bakhangelelwe ukubuyela njalo emthethwandaba ekuqaliseni kwenyanga ezayo mhlaka ziku four kuAugust.
Kusenjalo, umqondisi wenhlanganiso yabanye njalo abathengisa ezitaladini eyeZimbabwe Informal Sector Organization uMnu. Promise Mkhwananzi uthi abathengisayo balokhu belwisana lomanisipala nsuku-zonke ngaloludaba.
