Izisebenzi zenkampani yeNational Railways of Zimbabwe zithi zidaniswa ngumbiko owethulwe ngumphathintambo kahulumende obona ngezokuhambisa uMnu. Obert Mpofu othi inkampani kaLoliwe kayilamali yokubhadala iholo lezisebenzi elenyanga ezilitshumi lanye.
Esethula lumbiko emhlanganweni lentathelizindaba izolo, eceleni komhlangano we 7th Africa Transportation Technology Transfer osaqhubeka koBulawayo, uMnu. Mpofu uthe uhulumende usebenza gadalala ukudinga amankampani angancedisa ukuvuselela inkampani kaLoliwe.
Kodwa uthe lokhu akusoze kwenzakale ngesiphangi-phangi ngoba amankampani angancedisa, agoqela awe China kanye lebhanga le Development Bank of Southern Africa, azaqala alungiselele loluhlelo.
Lokhu kwenzakala inengi lezisebenzi kumakhansili kanye lamanye amankampani elizweni sezihlala okwesikhathi eside zingaholi njalo ezinye zikhalala umsebenzi.
Ukuze sihlaziye loludaba, sixoxe LoMnu. Japhet Moyo, unobhala jikelele wenhlanganiso elwela amalungelo ezisebenzi eye Zimbabwe Congress of Trade Unions.
UMnu. Moyo utshele uSithandekile Mhlanga weStudio 7 ukuthi iZCTU iyehluleka ukuncedisa izisebenzi ngemfanelo, ngenxa yemigoqo eminengi, egoqela ukusebenza kwemithethwandaba elizweni.