amalinks wokungena

Breaking News

Woza Friday: Silomculi Womdumo kaMaskandi uMehlokazulu


Mehlokazulu
Mehlokazulu
Kuhlandla leWoza Friday liviki siloMehlokazulu ledlalade lakhe elitsha lomculo kaMaskandi elithi "Izitha". Leli dlalade elilengoma ezilitshumi lambili lizalomdumo omutsha kaMaskandi njengoba lixubanisa iJazz, Imbube lawo umdumo kaMaskandi imbala.

USebenzani Mqolo osedume ngaleli acula ngalo elithi Mehlokazulu, yinsizwa ethwetshule yingwe eRatanyane eKezi ngo 1980. Wathi ekhula wahle waba ngubizwasabele emakwayeni, kwezembube lakweminye imihlobo yezomculo.
Linsizwa ethe ngokufika eGoli ngo 2001 yazakhela udumo emculweni kaMaskandi uthi esintwini awuzivezi emuntwini ungambingelelanga ngakhoke uthi nxa ebingelela abalandeli bakhe aphindaphinde aze acine esetemeleza.

UMehlokazulu wethule idlalade lakhe lakuqala ngo 2011 esithi uMakhelwane wami. Lelike lilandelwe ngelithi iPhupho lami ngo 2013. Uthike lamadlalade yiwo enza wethiwa igama elithi Mehlokazulu okuligama alethiwe ngabalandeli ngenxa yengoma zakhe ezibalimukisa ngezigigaba zempilo.

Lonyakake linsizwa isiyethule idlalade elilengoma ezilitshumi lambili elithi Izitha. Lonake limumethe ezifundisayo kanye lezokholo. UMehlokazulu uthi isihloko saleli dlalade esithi Izitha siqukethe okukhulu. Uthi empilweni ngeke uthandeke kuyewonke umuntu njengoba bezabakhona abakufisela okubi.

Lumculi uthi usebenze gadalala ukuthi owakhe umdumo kaMaskandi wehluke kwabanye oMaskandi. Uthi kowakhe uMaskandi kuxhubene umdumo weJazz, lowembube kanye lawo okamaskandi imbala.

Lumehluko wona uzwakala mngceke langendlela aqumbaqumba ngayo iziginci zakhe.
UMehlokazulu uthi akasilibali isitsho esithi ungabaklolodeli abakubambele ilele nxa usufikile esiqongweni funa balisuse kuhle kube yikutshabalala kwakho. Uthike ubonga abalandeli bakhe ngendlela abathakazelela ngayo umculo wakhe ngoba esazi ukuthi uyilokho ayikho khona lamhlanje ngenxayabo.

Kweyinye yalezi ingoma ucula ngonina ongasekho emhlabeni. Uthi unina uMaKhumalo wayemthanda okokuthi wayethi nxa efika ekhaya evela eGoli ahle aphume phandle amhlangabeze, kodwa khathesi nxa esengena ekhaya akasekho omhlangabezayo. Uthike lingoma laleli dlalade akaziculeli yena yedwa kodwa yisipho asipha bonke asebabhujelwa ngonina.

Linsizwa ithi ilamaphupho amakhulu kakhulu kwezomculo. Uhi njengomculi oqale ngembube, waya kuJazz engakangeni kumaskandi, isifiso sakhe ngesokuthuthukisa umculo womdabu.
please wait

No media source currently available

0:00 0:07:17 0:00
Lapho esitholakala khona
XS
SM
MD
LG