KuWoza Friday liviki silomculi wesifazane osakhulayo uThandeka Patricia Dhlana ophakathi kwemizamo eyokuzenzela ibizo kwele South Africa lapho ingoma ayikhiphe ngenyanga kaMpalakazi ethiwa ‘Ngeke’ ibikwa ivutha amalangabi.
UThandie Dhlana ngomunye wabaculi abasakhulayo abakhangelelwe ukuphakamisa umculo wolimi lwesiNdebele ndawonye labanye abagoqela uExmile kanye lo Pronix.
Lumculi oleminyaka eyokuzalwa engamatshumi amabili lantathu (23) wazakale nyakenye ecula umculo awubiza ngokuthi yi Ethno – soul kodwa lonyaka untshintshe unyawo wathutsha esetshaya umculo we House music.
Lumculi yena okhulele elokitshini le Gwabalanda ko Bulawayo ulesikhathi eside esebenza lo DJ Face yena igama lakhe elokuzalwa elithiwa ngu Thulani Nyashanu njalo basebenze bonke lanyakenye lapho uThandie akhiphe khona idlalade lakhe lakuqala elithiwa Ongaziwayo.
UThandie uyaphindela njalo elizweni le South Africa ensukwini ezilandelayo ukuyaqhubekela phambili esebenza lo DJ Face kanye labanye abaculi abayizizalwane zakhonale.
Okunye akhangelele ukukwenza ngesikhathi eselizweni le South Africa yikucula endaweni ezitshiyeneyo kanye lokwenza umfanekiso wengoma le ethi Ngeke yona ebikwa ihlanyisa abanengi khonale.
UDhlana uthi lingoma iyatshaywa emisakazweni etshiyeneyo kanye lasendaweni zokuzithokozisa.
Iyatholakala njalo ebulenjini lapho abalandeli bomculo abalakho ukuyithola nje mathupha endaweni ethiwa yi kasimp3 ngaphansi kwesihloko esithi DJ Face ft Thandie – Ngeke.
