Kuliviki kuhlelo Woza Friday intathelizindaba yeStudio Seven uJoseph Njanji uxoxa lomculi uTom Banda owaziwa ngegama lokuthi Tomza yena osanda kuhwatsha idlalade lakhe lakuqala elilesihloko esithi "The Guru".
UTomza uqale ezomculo ngesikhathi esesikolo eMpopoma High School lapho abenyingxenye ye Mpopoma Drama Group.
Ekuphumeni kwakhe esikolo uke wasebenza lamaqembu atshiyeneyo agoqela iLokshin Flava, iGo Boyz Achuzzi, ama Street Niggaz kanye labanye abatshiyeneyo.
Ngemva kweminyaka eyisikhombisa esenza ezomculo useze wenelisa ukukhipha idlalade lakhe lakuqala elibizwa ngokuthi The Guru.
UTomza uzelwe mhlaka 23 February ngomnyaka ka 1982 khonapha edolobheni lako Bulawayo njalo eminyakeni edluleyo ubesehlala elizweni le South Africa lapho athi ubelanda amathuba atholakala kulelolizwe kwezomculo.
Loba kunjalo ingoma ezinengi ezitholakala kudlalade lakhe zicindezelwe ema studios atholakala ko Bulawayo lapho abesebenzisana labantu abafana labo Mjox, uBlaks kanye lo Mzoe7.
Idlalade leli elithi The Guru lilengoma eziyisithupha njalo lezi ngezigoqela eziculwe ngendlela ezitshiyeneyo njengoba kukhona ezomculo we Kwaito, ezomculo we rap, ezomculo weHouse kanye lezomculo we Afro Pop.
Indimi ezisentshenziswe ukucula ingoma ezitshiyeneyo ezitholakala kulelidlalade lika Tomza ngezigoqela isiNdebele, isiNgisi, isiShona kanye lesiSotho.
Abanye abaculi abasebenze lo Tomza ukucindezela idlalade leli elithiwa The Guru ngabathi uBellz, uKingpills, uSkaiva, uHwaiza kanye lo MD.
