Izisebenzi zihlangane lohulumende lamuhla eHarare lapho ezivumelene ukuthi kufanele umongameli Robert Mugabe asebenzise amandla akhe ayenze iPresidential Proclamation ukuthi aguqule isinqumo somthethwandaba we Supreme Court esokuthi abaqhatshi sebengaxotsha izisebenzi mahlayana ngoku misa ama contracts azo ngemva kwenyanga ezintathu zazisiwe ngalelinyathelo, lanxa zingaphiwanga imali yokuzigumula emsebenzini.
Isiphathamandla senhlanganiso elwela amalungelo ezisebenzi eyeZimbabwe Congress of Trade Unions uMnu. George Nkiwane uthi sokuxotshwe izisebenzi ezedlula amakhulu ayisikhombisa kunsukwana ezimbalwa ezedluleyo umthethwandaba wethule lesi isinqumo.
Isinqumo somthethwandaba weSupreme Court sesisolwe ngamabandla ezombusazwe, izisebenzi, kanye labalwela malungelo oluntu.
UMnu. Nkiwane uthi umphathintambo wogatsha olubona ngokuphathelane lezisebenzi uNkosikazi Prisca Mupfumira, kanye lezinye ingatsha zikahulumende zithembisile ukuthi udaba lolu luzalungiswa ngesiphange-phange.
