Abanye abalandeli bebandla leZanu PF bathi uhlelo lwe Zimbabwe Agenda for Social and Economic Transformation – iZIMASSET - kumele lumiswe njengoba lungatholi usizo lwemali emazweni.
Abanye babo abakhulume leStudio 7 bathi kalusoze luthole imali njengoba kungela lizwe elisekela uhlelo lolu.
Bathi kunzima kakhulu ukuzwisisa okumunyethwe zingwalo zohlelo lolu ezicatshangelwa ukuthi zalotshwa ngelinye icele leZanu PF elikhokhelwa nguMnu. Emmerson Mnangagwa.
Bathi loba nje abalendeli bebandla leli bekhuluma okuhambelanayo emphakathini, inengi labo, ikakhulu labo abasekela umsekeli kaMongameli, uNkosikazi Joice Mujuru, bafuna uhlelo lolu lumiswe.
Bathi ilizwe kumele lenze ezinye inhlelo ezilohlonzi ezizathuthukisa umnotho kulokuchitha isikhathi bexotshanisana leZIMASSET engasoze iyendawo.
IStudio 7 ixoxe lomhleli wephephandaba leHerald uMnu. Caesar Zvayi othi kusobala ukuthi kulokulwa kubandla leli ngohlelo lolu.
UZvayi uthi uhlelo lolu lukhanya lungasekelwa ngamanye amazwe njalo abanye abalandeli bebandla leZanu PF kabaluzwisisi.
Kasenelisanga ukuxoxisana lesikhulumeli sebandla leli, uMnu. Rugare Gumbo.
UMujuru loMnangagwa bacatshangelwa ukuthi bafuna isikhundla sikaMongameli Robert Mugabe osekhulile. Ababili laba bayakulandula lokhu.
Sixoxe loMnu. Morris Ngwenya omunye wabalandeli bebandla le Zanu PF otshele uGibbs Dube weStudio 7 ukuthi ukuxokozela ngohlelo lolu akumangalisi njengoba kulungiselelwa umhlangano omkhulu weCongress ozakwenziwa ekupheleni komnyaka.