Ababengamalunga edale lephalamende kungakenziwa ukhetho olukhulu lwelizwe nyakenye, bathi kabakabhadalwa imali yokuya edale leli eyama allowances loba abanye babo bevukela emawofisini kahulumende nsukuzonke.
Bathi sebefuna ukuhambisa udaba lolu emthethwandaba wedale leLabour Court njengoba babeqhatshwe nguhulumende.
Bathi sebezame konke abangakwenza ukuthi bathole imali yabo efika inkulungwane ezilitshumi lanhlanu - $15,000 umuntu munye ngamunye.
Ingcwethi kwezemithetho yezisebenzi zithi abantu laba balakho ukuthola imali yabo ngesiphangiphangi nxa bengayifaka edale leLabour Court.
UMnu. Thandeko Zinti Mnkandla owayemele iGwanda North edale lephalamende utshele iStudio 7 ukuthi sesifikile isikhathi sokuthi bathathe inyathelo elizakwenza ukuthi uhulumende ababhadale imali yama allowances okwakumele bayithole besasebenza edale lephalamende.
UMnkandla uthi sebezame ngayo yonke indlela yokuthola imali la kodwa-ke uhulumende ulokhe esithi kalamali.