Inhlanganiso yabosomabhizimusi eye Confederation of Zimbabwe Industries ithi kuqhubekela phambili ukugugudeka komnotho wamafekithali elizweni okwenza ukuthi angenzi impahla enengi yokuthengisa.
Umbiko owethulwe yiCZI ehlolisisa isimo samafekitheli elizweni okwamanje utshengisa ukuthi amandla amafekithali okukhanda impahla alakho ukugugudeka ngesilinganiso phose sokulitshumi ekhulwini – 10 percent lonyaka.
Inhlanganiso le ithi lokhu kuzakwenzakala ikakhulu eMashonaland lapho okulokhe kulamafekithali amanengi ayenza impahla etshiyeneyo.
Okwamanje amafekithali amanengi kawenelisi ukusebenzisa imitshina yonke lokunye okufanayo okwenza ukuthi asebenzisa amandla ayisilinganiso phose sokungamatshumi amane ekhulwini – 39.6 percent.
Amafekithali avuka kancance ngomnyaka ka2011 kodwa-ke aqalisa ukwehluleka ukwenza impahla efanayo kumbe enenganyana ngomnyaka olandelayo ngenxa yokuswela imali yokuwathuthukisa lokulolonga imitshina.
Inkampani yeNational Social Security Authority ibika ukuthi amafekithali angamakhulu ayisikhombisa – 700 – adilika kusukela ngomnyaka ka2011. Inengi lawo kubikwa ukuthi ayesedolobheni lakoBulawayo.
Ukuze sihlaziye udaba lolu, uGibbs Dube weStudio 7 uxoxe loMnu. Japhet Moyo unobhala jikelele weZimbabwe Congress of Trade Unions othi umbiko lo kawumangalisi njengoba amafekithali exotsha izisebenzi ezinengi.