Umkhokheli webandla lezombusazwe ele Zapu, uMnu. Dumiso Dabengwa, uthi sokumele abantu beZimbabwe bahlale phansi bakhulume ngomnotho welizwe osubhidlika kulandela ukunqoba kukhetho kwebandla le Zanu PF nyakenye.
UDabengwa uthi abantu akade besemhlanganweni wenhlanganiso ezitshiyeneyo leziphathamandla zikahulumende ezigoqela uMnu. Patrick Chinamasa obona ngezemali, bake bahlala phansi baxoxa ngodaba lolu emhlanganweni omkhulu eHarare oqoqwe yiSAPES Trust.
Uthi kuyaziwa ukuthi umhlangano lo waphuma lezinqumo ezinengi zokuvuselela umnotho welizwe kodwa kusobala ukuthi uhulumende kadonsi ndawonye lozulu kudaba lolu.
UDabengwa uthi kuyamangalisa ukuthi ibandla elibusayo kalenzi lutho ngezinqumo lezi ngesikhathi liqhuba uhlelo lokwabela uzulu amashares amankampani emazweni.
Uthi kuyamangalisa ukuthi ibandla le Zanu PF lizama ukuvuselela umnotho welizwe lilodwa.