Ingcwethi zombusazwe ziyehlukana umbono zokwenziwa nguNkosikazi Grace Mugabe othi ulelungelo lokuthatha isikhundla sikamongameli njalo lokuthi umsekeli kamongameli, uNkosikazi Joice Mujuru kumele atshiye umsebenzi.
Ukuzwe sihlaziye okwenzakalayo kubandla leZanu PF, sixoxe lengcwethi kwezombusazwe uMnu. Brilliant Mhlanga ofundisa ekolitshini leWestminister eBhilithane loMnu. Bekezela Maduma ingcwethi yezombusazwe ezimele yodwa.
UMhlanga uthe kuliqiniso okunye okwethulunywe nguNkosikazi Grace Mugabe emhlanganweni yakhe ezabelweni lalamuhla lapho aveze khona ukuthi akukhanyi ukuthi umsekeli kamongameli welizwe, uNkosikazi Joice Mujuru, wayithola ngaphi inotho alayo okwamanje.
UNkosikazi Mugabe ufuna ukuthi uNkokazi Mujuru atshiye umsebenzi ngenxa yalokhu lokucatshangelwa ukuthi ubefuna ukugenqula uMongameli Robert Mugabe.
UMaduma uthe uNkosikazi Mugabe ubekhuluma angakwaziyo njengoba laye efuna isikhundla sikamongameli welizwe lokuqhuba izifiso zomphathintambo wezemithetho uMnu. Emmerson Mnangagwa olwisana loNkosikazi Mujuru.
Ababili laba bacatshangelwa ukuthi bafuna isikhundla somongameli webandla leZanu PF kanye lelizwe esiphethwe okwamanje nguMugabe.
UMugabe oleminyaka engamatshumi ayisitshiyagalolunye ukhangelelwe ukuthi kasoze ahlale okwesikhathi eside kulelibandla njengoba esekhuluphele.