Siphawulwe okusemthethweni isikhwama sezigidi ezingamakhulu ayisithupha zamadola-$600million, semali yokusebenzisa kunhlelo zezempilakahle ese Health Development Fund, emkhosini owenzelwe esibhedlela seMahusekwa eMarondera ngoLwesine.
Ummeli wenhlanganiso ye UNICEF eZimbabwe uMnumzana Hussein Reza, uveze isilinganiso semali okumele ibuthaniswe phansi kwalesi sikhwama ezaphathisa ekuthuthukiseni impilakahle kazulu, ikakhulu ukwehlisa ukulahlakelwa yimpilo kwabesifazane ngesikhathi bebeletha kanye lengane.
Lesi sibhedlela seMahusekwa esisanda kwakhiwa ngendlela yaphezulu siqale ukusebenza ngenyanga edluleyo kaMpandula, sikhangelelwe ukuphathisa uzulu wonke wesigabeni seMashonaland East.
Ubufakazi obunikezwe ngabanye asebethe bathola usizo lokwelatshwa okubalisa unkosikazi Tuwede Adam olandise udaba lokuba wathola njani usizo.
Umangalise uzulu uNkosikazi Adam, lapho encoma umsakazo weStudio Seven ethi ngoba kulapho ezwa khona lapho ayengaya khona ukuyathola usizo lokwelatshwa.
UMnumzana Mlondolozi Ndlovu obekhona emkhosini lo, uthi abungamangalisi ubufakazi obukankosikazi Adam ngoba kuyiwo umsakazo olandelwa ngabantu.
Kuyisibonelo sokuba uzulu engelani lokutshiwo ngabanye ukuthi limisakazo ingekho emthethweni kutsho uNdlovu.
UNkosikazi Noleen Ndoro ngomunye ofakaze phezu kosizo aluthole esibhedlela seMahusekwa, esakhiwe nggemali eyabuthaniswa phansi kwesikhwama seHealth Transision Fund.
Lumkhosi ungenwe zinkokheli zenhlanganiso ezehlukeneyo okuyizo ezikhangelelwe ukuphathisa ukubuthanisa imali yalesi sikhwama se Health Development Fund.
Lezi ngezibalisa eye DFID, UNICEF, WHO, UNFPA, EU, World Bank lamanye amanengi,inkokheli yomdabu,inkokhelu kunhlangothi ezehlukeneyo zempilakahle kanye lozulu weMahusekwa.
Bebekhona abekade belibazisa uzulu okubalisa iqembu lezibotshwa zeSt. Thomas eMarondera ebezisina imigido yomdabu okubalisa owe Jerusalema.