Imidlalo yenguqu kusigaba seCastle Premier Soccer League ingena kuviki yamatshumi amabili kulimpelaviki kulemidlalo egobhozisa amathe edolobheni lako Bulawayo ngoMgqibelo langeSonto.
Kusasa ngoMgqibelo iqembu elihlezi phezu kwengalane yemiklomelo ele Chicken Inn lizemukela iqembu le Hwange enkundleni ye Luveve.
Lumdlalo ozatshengiswa kumabonakude weSupersport ulakho ukuchaza abalandeli ngoba iqembu le Chicken Inn lifuna ukwala lilokhu likhokhela ngemiklomelo emihlanu kuthi ele Hwange lidinga ukukhuphuka engalaneni njengoba lihlezi endaweni eseduze lomsila wengalane yemiklomelo.
Komunye umdlalo okhona ngoMgqibelo iqembu le Flame Lily lizadlala lele Chapungu ngase Lafarge.
NgeSonto kuzakuba lemidlalo emibili enkundleni ye Barbourfields njalo owokuqala uzakuba phakathi kweqembu le How Mine lele Triangle ngehola lakuqala emini kuthi owesibili uzakuba phakathi kweqembu le Tsholotsho leqembu le Dynamos wona ozakuba ngehola lesithathu emini.
Limidlalo yomibili izatshengiswa kumabonakude weSupersport.
Ekhuluma ngemva komdlalo weqembu lakhe lele Caps United ophele zingutshiki lobhanqa 1 ka 1 ngoLwesine umqeqetshi weqembu le Tsholotsho, uLizwe Sweswe, uthe ukwenelisa ukuthola umklomelo bedlala leqembu elikhulu kuzabenza babe lesibindi abafana bakhe emdlalweni wangeSonto.
Kweminye imidlalo ekhona ngeSonto, iqembu le Whawha lizemukela ele Highlanders ngase Ascot, iqembu le Caps United lizadibana lele Dongo Sawmills ngase National Sports Stadium kuthi iqembu le FC Platinum lizangqikilana lele ZPC Kariba ngase Mandava.
Umdlalo wokucina oweviki lamatshumi amabili ukhona ngoMvulo njalo uzakuba phakathi kwe Harare City le Buffaloes enkundleni ye Rufaro.
Kolunye udaba olumayelana lomdlalo wenguqu, iqembu labesifazane elimela ilizwe emdlalweni wenguqu lizemukela iqembu elimela ilizwe le Ivory Coast ngeSonto enkundleni ye Rufaro emdlalweni wokudinga amazwe azakuyadlala kumidlalo ye Olympics ezaqhutshelwa elizweni le Brazil.
Iqembu le Zimbabwe lingena kulumdlalo kumele linqobe ngemiklomelo emine kungela mpendulo ukuze lidlulele phambili ngoba iqembu le Ivory Coast liphiwe imiklomelo emithathu mathupha ngemva kokuba amantombazana eZimbabwe ehluleke ukuya kwele Ivory Coast.
Sikhangele umdlalo kakhilikithi; Iqembu lamantombaana aleminyaka engaphansi kwetshumi lathoba munwe munye elimela ilizwe emdlalweni kakhilikithi liselizweni le Botswana lapho eliyephatheka khona kumidlalo engenwe ngamaqembu amazwe amane agoqela ele Namibia, ele Mozambique, ele Botswana kanye lalo ele Zimbabwe.
Lawa maqembu azangqikilana phakathi kwemidlalo yama overs angamatshumi amane ebanga imiklomelo njalo iqembu elizaqeda imidlalo yalo lilemiklomelo eminengi yilo elizanqoba.