Ezinye izizalwane zeZimbabwe zithi ukungahlali phansi kuka Mongameli Robert Mugabe esiya emazweni nsuku zonke, kuphazamisa imihlangano eqhakathekileyo yokubuswa kwelizwe njengoba esehlala engekho ekhaya.
Zithi ilizwe kalisabuswa ngemfanelo.
UMugabe usanda kuvela kweleJapan lapho akade esemhlanganweni weWorld Conference on Disaster Risk Management.
Uthe efika ekhaya wahle walubhekisa kwele Namibia emkhosini wokugcotshwa kukaMongameli Hage Geingob ukuthatha intambo zombuso.
NgoMvulo uMugabe ulubhekisa kwele Algeria ukuyahlangana leziphathamandla zakulelo lizwe. UMugabe uke wethekelela kweleEthiopia ngoZibandlela esamukela isikhundla sikamgcinisihlalo wenhlanganiso yeAfrican Union.
Engakayi kwele Ethiopia uke wayakukhefu lakhe lomnyaka lemmuli yakhe eSingapore. Esuka kwele Ethiopia uphindele kwele eSingapore esiyathatha umkakhe engakalubhekisi kwele Zambia lapho emkhosini wokugcotshwa kukamongameli Edgar Lungu.
Sikhulumanje uMugabe ukhangelelwe ukulubhekisa kwamanye amazwe esevela kwele Algeria phansi kwenhlanganiso yeAfrican Union le SADC.
Omunye walabo abasola okwenziwa nguMugabe, nguMnu. Albert Mhlanga okubandla leMDC-Renewal othi imihlangano yonke eqakathekileyo isimisiwe yikungahlali phansi kukaMugabe.
Kodwa-ke umsekeli webandla leZanu PF, uMnu. Fidelis Fengu njalo oyingcwethi kwezombusazwe utshele uGibbs Dube ukuthi uMugabe uqhuba owakwetheswa nguzulu owamkhethayo kukhetho lukamongameli ngomnyaka ka2013.