amalinks wokungena

Breaking News

Sokuqalisile Ukuxokozela Kokuthenga Amashares eGreen Fuel


Iziphathamandla zeGreen Fuel Private Limited elungisa umhluzi wetshukela owe ethanol zithi kumele uhulumende adinge imali ehambelana lenani yamashares afuna ukuwathenga kunkampani le ukwenzela ukuthi iqhube umsebenzi ngemfanelo.

Umqondisi wayo Umnu. Greame Smith utshele ikhomithi yedale lephalamende ebona ngokwabelana amashares amankampani emazweni ngoLwesine ukuthi amashares ayisilinganiso sokungamatshumi amahlanu lanye ekhulwini – 51 percent – afunwa ngukulumende kumele awathenge ngentengo esemkhambo okwamanje.

USmith uthi uhulumende angakwenza ngale indlela kulakho ukunceda ukuthi kungacunuli abafaka izigidi ezedlula amakhulu amathathu amadollar eMelika - $300 million yokusungula inkampani le.

Uhulumende ulamashares angaba yisilinganiso sokulitshumi ekhulwini – 10 percent kunkampani le abanjwe luhlangothi lwakhe olwe Agricultural Rural Development Authority (ARDA).

IMadcom Investments yavuma ukuguqula isivumelwano eyasenza lohulumende kusungulwa iGreen Fuel esithiwa yiBuild and Operate. Kwakumele ukuthi ithathe isikhathi eside ilokhe iyiyo ekhangelane lokwenzakala kunkampani le ingakanikezi amashares amanengi uhulumende.

Okwamanje isibhekane lokuthi kumele iguqule ngesiphangiphangi inkampani le ibengaphansi kukahulumende le Madcom Investments kaMnu. Billy Rautenbach eyiyo esazibambe esidukwini.

Ingcwethi kwezenotho uMnu. Walter Mbongolwane uthi akaboni uhulumende eyithola imali yokuthenga amashares awe Green Fuel ngentengo esemkambo okwamanje.

Kodwa-ke uMnu. Morris Ngwenya ingcwethi kwezombusazwe okubandla le Zanu PF uthi kuhle okwenzakala eGreen Fuel.
XS
SM
MD
LG