Izakhamizi zeKezi emhlubulweni weMatabeleland South zibhekane lendlala embi kulandela ukungani kuhle kwezulu lokhu umnyaka waqalayo, esezidinga ukuphathiswa ngokudla ngoba vele umangoye eseqalile ukulala eziko emizini eminengi.
Lanxa nje kujwayelekile ukuthi ngalesisikhathi sikaNhlolanja inengi labantu elilimileyo liyabe lichinsa liqala ukudla amakhomane, ulude kanye lamabhobola likhangelele ukuqala ukudla umumbu, amakhabe kanye lezimfe kumaviki ambalwa azayo, lokhu liphupho lonyaka emhlubulweni weKezi.
Izakhamizi zithi ilanga selitshise lakhupha imikhobo eziphaleni phezu kokuthi lezulu licine ukuna nyakenye lihambe lamathemba abalimi ukuthi bazathola isivuno lonyaka bathole ukugcina abantwana.
Lanxa nje izulu lisilela kundawo ezinengi zelizwe, umlimisi wakulindawo uMnumzana Majaha Nkabinde, uthi kungaphela nje enye iviki izulu lingananga kuyabe kungasathembisi ukuthi izilimo zizaphinda zivuke. Uthi abantu bakulindawo babulewe yikusilela kwezulu kanye lenhlanyelo eyomhlobo ophanga uvuthwe ngoba kuvamile ukuthi izulu linayine beselihamba.
Umnumzana Johane Nkomazana, isakhamuzi, uthi yena sehle walahla ithemba ngoba ivele isingenile indlala emakhaya. Uthi sebeqalile ukuthengisa izifuyo bethenga impuphu kuthi labo abavele bengela sebelala bebophe izisu ngamaqhele. Uthi sebemelele ukuthi inhlanganiso eziphathisa ngokudla zize ngoba kungenziwanga njalo, bazangcwatshwa lonyaka abantu ngenxa yendlala.
UKhansila ka Ward 10, uMnumzana Alexander Phiri, uthi sebeqalile ukucela usizo kuhulumende kanye lakunhlanganiso ezizimele zodwa ngoba umumo mubi.
IKezi ingezinye zezindawo ezivele zivame ukusilela izulu lanxa nje abalimayo belokhu belandela izikhathi lendlela zakudala. Esinye njalo isakhamuzi, uMnumzana Cephas Mthethwa uthi uhlupho lwamanzi lalo soluqalile ngoba imigodi yamanzi layo ingeneli. Uthi yena labomakhelwane bakhe basebenzisa umgodi owodwa owawuvele ungowedibha ukukha amanzi lawo osusitsha njalo lempompi sezigugile.
Indawo ezibhekane lodubo oluphezulu zendlala yiMabonyane, Mayetshe, Bhalagwe, Mbuya leGohole.
