Kuqhamuka ukufuthelana emikhambo yezitaladeni zeHarare kubangwa indawo zokuthengisela ngenxa yokwanda kwabantu abazama ukuphila ngokuthengisa kulelidolobho.
Ukuxokozela lokhu kwenzakale phakathi kwemigwaqo ebalisa uJason Moyo lo Robert Mugabe duzane nje lamahofisi ka khansili abantu belwela indawo zokuthengisela baze bakhuzwa yinkokheli ezibona ngokusebenza okunje.
Lababantu bathi bathe befika ekuseni endaweni abathengisela kizo bafica sokulabanye abantu bethengisela khona.
Ocubungula ngezomnotho umnumzana Masimba Kuchera uthi uhulumende nguye obangela ukuba izinto zime kanje ngoba engenelisi ukuvulela uzulu imisebenzi:
Umgcinisihlalo wenhlanganiso emela abaphila ngokuthengisa emigwaqweni eye National Vendors Union Zimbabwe umnumzana Stan Zvorwadza uthi baxwayise umnumzana Ignitious Chombo ophethe ezokubuswa kwamadolobha lezabelo ukuba bebambe umhlangano bephume lecebo elihle kudaba lwabantu abanje ngoba imizamo yakhe yokufuna ukuba besuswe besiwe kundawo eziqoqiweyo ingasebenzi.
Uthi kulendawo ezilitshumi lantathu kuphela ezilakho ukusetshenziswa ngabantu abazinkulungwane eziyisithupha-6000 kuphela khona abantu abadinga indawo zokuthengisela kanje besedlula inkulungwane ezilikhulu- 100 000 okwamanje kuleli dolobho, njalo lezo ndawo sezivele sezigcwele ngabantu abathengisela kizo.
UKuchera uthi sokudingakala ukuba uhulumende ezame ukudinga amacebo aqinileyo okulungisisa udaba lokuswelakala kwemisebenzi:
Uthi ngomumo wezinto abantu bazaqhubeka besanda abafuna ukuthola impilo ngokuthengisa ezitaladeni ngoba amabhizimusi akhona lawo eqhubeka engezela inani labantu abagunyulwa emisebenzini.
UZvorwadza uthi kulabantu abaphila kanje abedlula kuzigidi ezintathu kuleli abanye bethengisela ezindlini zabo lasemagedini ezindlu kodwa abathengisela phakathi laphakathi kwedolobha le Harare besedlula kunkulungwane ezilikhulu 100 000.
Asenelisanga ukukhuluma lesikhulumeli sekhansili yedolobha le Harare umnumzana Michael Chideme obengemukeli umakhalekhukhwini wake.