amalinks wokungena

Breaking News

Abasakhulayo Kubandla leZanu PF Bafuna Kuxotshwe uMutasa


UMongameli Robert Mugabe.
UMongameli Robert Mugabe.

UMongameli Robert Mugabe uphindele ekhaya ngoLwesine evela kukhefu emazweni angempumalanga wahlangabezwa ngabasakhulayo bebandla lakhe leZanu PF egcekeni lendizamtshina ele Harare Airport betshengisela befuna kuxotshwe uMnu. Didymus Mutasa ebandleni.

Okhokhela uhlangothi lwabasakhulayo kubandla leli, uMnu. Godwin Gomwe, utshele iStudio 7 ukuthi batshengisele egcekeni lendizamtshina bephendla indlela yokuthi uMugabe axotshe uMutasa ofuna ukuthi kuguqulwe impumela yeCongress yebandla leli eyethulwe ngenyanga edluleyo.

UGomwe uthi abasakhulayo batshele uMugabe ukuthi uMutasa uyadelela njengoba efuna ukuthi kwenziwe eyinye iCongress esithi leyo eyenziwe ngoMpalakazi kayikho emthethweni.

Uthe uMugabe ulalele konke abakukhulumileyo wathi kuyasinda ukuthi uMutasa labanye bakhe abagoqela owayengumsekeli kamongameli welizwe, uNkosikazi Joice Mujuru, bafuna ukwenza santando loba basuswa ezikhundleni ngesikhathi seCongress.

UMutasa, owayekhangelane lokwenzakala kubandla le Zanu PF, uMujuru labanye babo betheswa icala lokuthi bebefuna ukukhipha uMugabe esikhundleni okungekho emthwethweni. Bayakulandula konke lokhu.

Kasenelisanga ukukhuluma loMutasa ngodaba lolu njengoba umakhalekhukhwini wakhe kade engaphendulwa. UMnu. Joseph Tshuma, okudale leZanu PF Central Committee, utshele uGibbs Dube weStudio 7 ukuthi abasakhulayo balelungelo lokutshengisela okunjengalokho okwenzakale lamuhla eHarare.

XS
SM
MD
LG