Inhlanganiso yezifundi eyeZimbabwe National Students’ Union ithi isithole amabizo ezifundi edlula inkulungwane ezimbili lamakhulu angamatshumi amahlanu – 250,000 abafuna ukuncedisa ukuhambisa emthethwandaba udaba lokuthi kuhlolisiswe indlela uNkosikazi Grace Mugabe athola ngayo isicoco seDoctor of Philosophy ekolitshini leUniversity of Zimbabwe.
Umqondisi weZINASU, uMnu. Gilbert Mutubuki, utshele iStudio 7 ukuthi bazama ukuthi udaba abazalwethula edale lomthethwandaba weConstitutional Court lungabi lamaphutha angenza ukuthi behluleke ukunqoba.
Uthi lokhe bedinga ezinye izifundi ukuthi zincedise ekufakeni amabizo abo kugwalo lolu olubizwa ngokuthi yi-petition. Uthi babophisa uChancellor weUniversity of Zimbabwe, uMongameli Robert Mugabe, umsekeli wakhe, uLevy Nyagura lekolitshi leli elapha uNkosikazi Mugabe isicoco lesi.
UMutubuki uthi lokhu bakwenzela ukuthi izicoco zeU-Z zingalulazeki. Sixoxe lomunye wakhe, uMnu. Praise Moyo, otshele uGibbs Dube weStudio 7 ukuthi bazazama ngamandla wonke ukuthi bathole amanye amabizo ezifundi ukwenzela ukuthi abakwenzayo lokhu kuhlonitshwe lidale lomthethwandaba.
Okhangelane lobudlelwano bukaNkosikazi Mugabe lozulu, uMnu. Lawrence Kamwi, uyalile ukukhuluma ngodaba lolu esithi kadlelani leStudio 7.
Siphinde njalo sazama ukukhuluma loDr. Munyaradzi Madambi obona ngokuphila kwezifundi, okade engaphenduli umakhalekhukhwini wakhe.
Igqwetha elizimele lodwa elikhangelane lamalungelo oluntu, uMnu. Job Sibanda, utshele uGibbs Dube weStudio 7 ukuthi ingwalo lezi esezilotshwa yizifundi zilakho ukungancedisi kakhulu udaba lolu lungahambiswa edale lomthethwandaba.