amalinks wokungena

Breaking News

Izathwala Nzima Imisakazo Ezavulwa Lonyaka


Imisakazo elakho ukunikwa ama licenses yiBroadcasting Authority of Zimbabwe lonyaka ilakho ukuvala isanda kusungulwa ngenxa yokuswelakala kwemali kwele Zimbabwe.

Abadinga invumo yokuvula imisakazo lalabo abakhangele okwenzakalayo bathi kunzima phambili njengoba labo abazanikwa amalicenses kuyamele babe lendawo yokusebenzela, beqhatshe izisebenzi njalo babe lokokusakazisa – ama transmitters.

Bathi okusindayo yikuthi umnotho welizwe kawulamali yokuthi abantu bathengise abakufunayo emisakazweni lo okuyikho okuphandela imisakazo imali.

Inkampani yeAlpha Media Holdings elamaphephandaba ambalwa njalo edinga invumo yokuba lemisakazo embili, ithi izasebenza gadalala ukuthi imisakazo le iphumelele nxa ingaphiwa invumo yokwenza lokhu yiB-A-Z.

Okwamanje ithwele nzima ngokubhadala iholo lezisebenzi ngenxa yesimo esibi somnotho welizwe olamankampani angenzi impahla enengi yokuthenga lokuthengisa.

Kukhangelelwe ukuthi amalicense amatsha azanikwa amankampani ngesikhatshana esilandelayo.

UMnu. John Masuku umqondisi weVoice of the People Radio Station uthi azathwala nzima amankampani azathola ama licenses njengoba umnotho welizwe utshengisa ukuthi udilika ngamandla.

Imisakazo yeStar FM leZI FM eyanikwa ama licenses yiB-A-Z ithwele nzima okwamanje ngokukhanda imali ngenxa yokuswelakala kwebathengisa okutshiyeneyo – ama adverts.

Imisakazo le ilakho ukuthathelwa amalicenses nxa ingafakanga ama transmitters elizweni lonke afika amatshumi amane lesitshiyangalombili – 48.

XS
SM
MD
LG