Inkokheli yeSADC isithethe isinqumo sokuthi kumele kuqhutshwe uhlelo lokuphandela uzulu ukudla olweFood and Nutrition Security Strategy oluqalisa ngomnyaka ozayo lusiyaphela ngomnyaka ka2025.
Inkokheli le ithethe isinqumo lesi igqhiba umhlangano wayo omkhulu eVictoria Falls ophele ngoLwesibili ntambama.
Umbiko owethulwe kuphela lumhlangano uthi uhlelo lolu lokudingela uzulu ukudla kusetshenziswa ezemvelo ezitholakala emazweni la kuzakwenza kube lokudla okunengi njalo uzulu ayenelise ukukuthola ngemfanelo.
Inkokheli le ithe lokhe kufunakala ukudla okunengi loba nje abalimi bezamile lonyaka ukulima ngamandla emazweni wonke. Ithi kuyabukeka njalo ukuthi amalungelo abesifazane ayananzwa emazweni atshiyenayo loba nje kulokhe kudingakala ukuthi kwenziwe ngamandla.
Inkokheli le iphinde yathi kumele kuvulwe amafekithali amanengi ukwenzela ukuthi uzulu abelemisebenzi elethela imuli ezinengi okokuziphilisa.
ISADC idinga amabillion angamakhulu amahlanu amadollar eMelika - $500 yokusungula uhlelo lwayo olubizwa ngokuthi yi Infrastructure Development Master Plan.
Ingcwethi kwezombusazwe, uMnu. Nkululeko Sibanda, uthi kuyancomeka okwethulwe yinkokheli yeSADC.
USibanda uthe okuzahlupha yikuswelakala kwemali yokuqhuba inhlelo ezitshiyeneyo.