Umnu. Fletcher Dulini Ncube, isiphathamandla sebandla leMDC ekhokhelwa nguMnu. Welshman Ncube, obhubhe izolo, ukhangelelwe ukuthi uzangcwatshwa ngeviki ezayo.
Isikhulumeli sebandla leli, uMnu. Nhlanhla Dube, utshele iStudio 7 ukuthi immuli kaDulini Ncube ebuthene elokitshini leHillside koBulawayo, isamelele umntanakhe ohlala emazweni okhangelelwe ukuthi uzafika ekhaya ngoMvulo.
UDube uthe ibandla leli likhangelelwe ukuthi lizakwenza umhlangano omkhulu kusasa lapho okuzahluzwa khona indaba ezitshiyeneyo ezizagoqela ukubhubha kukaDulini Ncube.
UDube uphinde wathi kukhanya kungaba yikuchitha isikhathi nxa ibandla leli lingathatha udaba lukamufi lilufake ezandleni zebandla leZanu PF elijayele ukuthatha izinqumo zokuthi ngubani ongcwatshwa emathuneni amaqhawe iNational Heroes Acre.
UDulini wake wabotshwa ngomnyaka ka2002 ecatshangelwa ukuthi wabulala owalwela impi yenkululeko uCain Nkala.
UDulini Ncube labanye bakhe abambalwa batholaka bengelacala ngumthethwandaba.
Kodwa-ke Ilihlo lakhe lafiphala ephuma esitokisini samapholisa lapho athi wayencitshwa amaphilisi okwelapha umkhuhlane wetshukela – owe diabetes.
Akesizwe uDube ekhuluma lo Gibbs Dube weStudio 7 ngokungcwatshwa kukaDulini obhubhe ebambe isikhundla somgcinisihlalo weMDC Council of Elders.