Kuhlelo lwamasiko lokuphila kwabantu, lamuhla sikhangela udaba lwezokulima ikakhulu ukusilela kwemvundiso ye fertilizer eZimbabwe.
Umsekeli wendunankulu kunhlanganiso yeChief’s Council, uChief Mtshane Khumalo, uthi uhulumende kumele azame ngamandla wonke ukuthi abalimi bathole imvundiso ye fertilizer lonyaka esilela mnyaka yonke.
UChief Khumalo uthi ukuswelakala kwemvundiso le kwenza ukuthi abalimi bangatshayi inala njengoba kufunakala imvundiso yeAmmonium Nitrate leCompound D endaweni zonke zelizwe.
Uthi imvundiso le kayikathengwa yizitolo ezinengi emaphandleni lemadolobheni okuveza ukuthi ilakho ukusilela futhi lonyaka.
Abalimi endaweni ezitshiyeneyo zelizwe bathi kutholakala inhlanyelo yomumbu kuphela ezitolo.
Bathi kuyamangalisa ukuthi uhulumende kakakhuthazi amankampani alungisa imvundiso le ukuthi achole ezakwanela abalimi.
Inengi labalimi seliqalisile ukulungisa amasimu. UChief Mtshane utshele uGibbs Dube weStudio 7 ukuthi kumele abalimi labo basebenzise amanye amaqhinga okufaka imvundiso emasimini.