Uhulumende uthi kusukela ngomnyaka ozayo, abantwana beskolo sokuzamele baqalisele emfundweni yaphansi kusibanga se pre-school, kusiya kwabakusigaba sezifundo ze “ A ” Level, ukuphatheka kwezemidlalo, ibe yingxenye yezifundo zabo.
Lokhu kuvezwe ngumsekeli wezemfundo ye Primary le Secondary uProffessor Paul Mavhima obengumhlonitshwa emkhosini wokwamukela iqula labasakhulayo, abaphila lobugoga obehlukeneyo, elisanda kuphenduka kumidlalo yama Special Olympics World Games ebisenzelwa e Los Angels kwele Melika ngoNhlangula.
Lanxa leliqula labadlali abalitshumi lanhlanu lihambe nzima eMelika lanelise ukuthola izicoco ezilitshumi lambili emncintisweni ongenwe ngabadlali abavele emazweni edlula ikhulu lengxenye- 165.
Unkosikazi Nomsa Sibanda osebenzela eZimcare Trust eGweru, wamukele ngenjabulo umbiko kahulumende lo. Kodwa uthi kusese lomsebenzi wokuguqula imibono kazulu lababablisi phezu kwendlela bababheka ngayo abasalela ezifundweni.
Unkosikazi Sibanda ngomunye wenkokheli yenhlanganiso ye Special Olympics Zimbabwe eyanelise ukubaphelekezela laba bantwana. Uthi bekunzima ukululungiselela loluhambo lweMelika lanxa impumela yayo ibajabulisile.
Laba bantwana abaphatheke kulemidlalo batshele abekade bekulomkhosi wokubemukela bathi bafisa ngabe bayatholiswa ithuba lokuyabonisa umongameli welizwe lezo zicoco abaze lazo bevelela kulemidlalo.
U Tsitsi Bongani Maponda oleminyaka engamatshumi amabili, ngomunye wabaphatheke emnintisweni emdlalweni weGolf.
Lo ngumdlalo vele ongadlalwa ngamantombazana amanengi njengaye kuveza uTsitsi.
EleZimbabwe libuyele ekuphathekeni kulumncintiswano ngomnyaka ka 2013 ngemva kokuba beyivuselele ilicense yabo kwabenhlanganiso yama Special Olympics.
Like lamiswa, ukuphatheka kulemidlalo ngomnyaka ka
2007 ngemva kokuswela imali yokuhlawulela i-license ebavumela ukuphatheka, ilizwe libhekane lobunzima kwezenotho.