Inhlanganiso yamankampani azimele wodwa eye Confederation of Zimbabwe Industries ithi izaba lomhlangano omkhulu ngoLwesine eHarare wokuhlolisisa isimo somnotho welizwe.
Umhlangano lo obizwa ngokuthi yiAnnual Economic Outlook Series uzabe ulesihloko esithi ‘Taking Zimbabwe Industry to the Next Level’.
ICZI eyethule umbiko lo ebulenjini be internet kuwebsite yayo, ithi ikhangele ukuthi kuzaba lenhlanganiso ezinengi ezizabuya emhlanganweni lo ezinjenge World Bank, International Monetary Fund, iziphathamandla zikahulumende labaqondisi bamankampani.
Iziphathamandla zikahulumende ezikhangelelwe ukuthi zizahamba emhlanganweni lo zigoqela umphathintambo wezemali uMnu. Patrick Chinamasa, uMnu. Mike Bimha okhangelane lezamafekithali, uMnu. Christopher Mushowe obambe uhlangothi oluqhuba uhlelo lokwabela uzulu amashares amankampani emazweni, uMnu. Walter Chidakwa obona ngezemigodi labanye babo.
Umhlangano lo wenziwa ngesikhathi umnotho welizwe ugugudeka okumangalisayo ngenxa yokuswelakala kwemali yokuvuselela amafekithali lokwesaba kwabosomabhizimusi bemazweni ukuthi bavule amankampani elizweni ngenxa yohlelo lwe indigenization.
Ukuze sihlaziye udaba lolu, akesiwe uMnu. Rejoice Ngwenya ingcwethi kwezenotho njalo okunhlanganiso yeLiberal Market Solutions othi awuncedi lutho umhlangano lo njengoba sokwenziwa eminye efanayo engazange iguqule isimo somnotho welizwe.