amalinks wokungena

Breaking News

Umthethwandaba Umisa Ukuxotshwa Kwabokuza Kwele South Africa


Kunyanga ephelileye kulezizalwane zeZimbabwe ezibalekele udlakela kwele South Africa.
Kunyanga ephelileye kulezizalwane zeZimbabwe ezibalekele udlakela kwele South Africa.

Umthethwandaba weJohannesburg High Court usumise ukuphindiselwa emuva kwezizalwane zakwamanye amazwe ezedlula amakhulu amabili ezibanjwe ziselizweni ngokungekho emthethweni kuze kube yisikhathi lapho amagqwetha amalungelo oluntu esekhulume lababotshiweyo laba.

Amagqwethala ahambe emthethwandaba ngoLwesibili ngemva kokuba ugatsha lwendaba zasekhaya kanye lamapholisa balile ukulandela isinqumo somthethwanda ebesilaya ukuthi amagqwetha aphiwe imvumo yokubonana labakwamanye amazwe laba ababotshwe ngolweSihlanu weviki ephelileyo inengi labo kuyizizalwane zeZimbabwe abezihlala eCentral Methodist Church eJohannesburg.

NgolweSihlanu umthethwandaba weHigh Court eJohannesburg wethule isinqumo sokuthi amaqwetha ezamalungelo oluntu aphiwe imvumo yokukhulumisana lababotshwe beselizweni okungekho emthethweni ngolweSihlanu eJohannesburg, abedlula amakhulu amabili, inengi labo kungabeZimbabwe abebehlala eCentral Methodist Church.

Ngemva kokuba ugatsha lwendaba zasekhaya lamapholisa sebalile ukulandela isinqumo lesi, amagqwethala abuyele emthethwandaba lamhlanje kwathi ngemva kokuxoxisana kwavunyelwana ukuthi ababotshiweyo laba bangabuyiselwa emazweni abo baze bakhulume labagqwetha ezamalungelo oluntu.

Igqwetha lezamalungelo oluntu umnumzana Wayne Ncube, uthi basemukela ngezandla zombili isinqumo somthethwandaba njengoba bekholwa ukuthi kwababotshiweyo laba kungaba labanye abafaka izicelo zokuphephela.

Omunye wenhlanganiso eziphikisana le Operation Fiela kumbe Thanyela umnumnzana Stephen Faulker uthi okubacasula kakhulu yikuthi iOperation Fiela ifana xathu lexenophobia umehlukonje yikuthile yenziwa nguhuluemdne esebenzisa amapholisa lamasotsha.

Uthi njalo ababotshiweyo laba bagcinwe endaweni ezingahlanzekanga, bengaphiwa ukudla okwaneleyo, abanye kungabagulayo kanti kubotshwe labomama abalabantwana.

Unkosazana Thuli Ngubane, ilunga lenhlanganiso ye Awethu layo ephikisana lo Operation Fiela, laye usola kakhulu inyathelo likahulumende lokuthi abantu bethi beqeda ukuhlaselwa kube yibo abazingelwayo bebotshwa nguhulumende kulokuthi kwenziwe amanyathelo okubavikela.

Kulandela isinqumo somthethwandaba lesi uNcube uthi kusasa bazaphiwa amagama abantu bonke ababotshiweyo lendawo abakizo ukuze bayehlola ukuthi akukho yini abangacina sebephindiselwa emazweni abo bona belemvumo yokuba kuleli.

Lelinyathelo selitshayelwe ihlombe yizizalwane zeZimbabwe njengoba inengi labo kuyibo ababotshelwe ukuba selizweni ngokungekho emthethweni. Isikhulumeli sebandla le Mthwakazi Liberation Front umnumnzana David Magagula uthi umongameli Zuma kufanele aphumele obala ngenjongo yeOperation Fiela hatshi ukucatsha ngokuthi kudingwa izigangi khona sekusobala ukuthi luhlelo lokuzingela abakwamanye amazwe.

Sekubotshwe abakwamanye amazwe abaphose befike inkulungwane selokhu kuqale uhlelo lweOperation Thanyela olwaqalwa nguhulumende nemavikini amabili edluleyo esithi ngolukuzingela izephulamthetho.

XS
SM
MD
LG