amalinks wokungena

Breaking News

Zingamatshumi Amathathu Izifundi zeZimbabwe Kuhlelo LweYALI


Kulabasakhulayo beZimbabwe abangamatshumi amathathu lonyaka abazaphatheka kuhlelo lweMelika olokuthuthukisa abasakhulayo abavela eAfrica olweYoung African Leaders Initiative (YALI).

Loluhlelo lusungulwe nguMongameli Barack Obama ngomnyaka ka2010 ngenjongo yokuthuthukisa abatsha beAfrica kundaba zobukhokheli kanye lakumabhizimusi.

Abatsha laba bazaba seMelika okwenyanga phose ezimbili befunda emakolishini atshiyeneyo agoqela iArizona University, iYale University, Tulane University, Dartmouth College lamanye atshiyeneyo.

UNkosikazi Sibusisiwe Ndlovu Bhebhe, oyintathelizindaba njalo ekhankasela ukulinganiswa kwamathuba abesifazana labesilisa ngomunye wabazaphatheka kuloluhlelo.

UNkosikazi Bhebhe uleminyaka yokuzalwa engamatshumi amathathu lantathu, 33, njalo uzaqhubela izifundo zakhe eUniversity of Delaware.

Simbuze ukuthi kuyini akukhangeleleyo kuloluhlelo.

"Ngikhagelele ukufunga ngendlela eleMelika elizibusa ngayo, ikakhulu ukuphatheka kwabantu abangekho kwezombusazwe kundlela ababuswa ngayo," kutsho uNkosikazi Bhebhe.

Wengeze wathi uyalukhwabitha uhlelo lokuthuthukisa abatsha lolu ngoba lubapha ithuba lokuzithuthukisa empilweni.

Abatsha beZimbabwe laba bazahlangana labosowabo abavela emazweni agoqela iCameroon, Mali, Nigeria, Uganda, Madagascar lamanye amazwe eAfrica phansi kohlelo lolu.

UMnu Emmanuel Ndlovu, oleminyaka engamatshumi amabili lasitshiyagalolunye njalo ozaqhubela izifundo zakhe eUniversity of Virginia uthi ukuhlangana labasakhulayo abavela emazweni atshiyeneyo kuzamupha ithuba lokufunda izinto ezinengi.

UNdlovu usebenzela inhlanganiso yezakhamizi koBulawayo iBulawayo Progressive Residents Association.

"Ngizakhulumisana labanye bethu esizahlangana labo sikhulumisana ukuthi kuyini esingakwenza ukuthuthukisa impilo zethu," kutsho uMnu Ndlovu.

Abanye esikhulume labo abathi bajabule kakhulu ngokukhethwa ukuphatheka kuloluhlelo bagoqela igqwetha uMnu Moses Nkomo loMnu Brian Geza.

Babikwa bebedlula inkulungwane lamakhulu amahlanu abatsha beZimbabwe abafake ama application abo bedinga ukuphatheka kuloluhlelo, kodwa bangamatshumi amathathu kuphela abaphumeleleyo.

Elizweni elinjengeZimbabwe okungela misebenzi khona abatsha laba bathi balethemba ulwazi abazaluthola luzabenza benelise ukuzithuthukisa bathole ukuphila kuhle kanti njalo bathuthukise abanye abatsha lozulu nje jikelele.
XS
SM
MD
LG