Inhlanganiso ye Zimbabwe National Family Planning Council iphathiswa yi Family Health Company yase Chicago kweleMelika, isungula uhlelo lwe lokusebenzelana lozulu wemaphandleni,lwe “ Home Meeting Strategy ”, kuqalwa ngezigaba ezintathu elizweni,ngenhloso yokuthuthukiswa kwendlela ezingasetshenziswa ukukhankasela indlela yokuzivikela yokusebenzisa umhlobo we condom labesifazane elithiwa yi Female Condom 2 – FC2.
Lokhu kuvezwe ngabenhlanganiso ye ZNFPC,emhlanganweni lentathelizindaba, owenzelwe e weteleni ye Rhodes/Nyanga Hotel esigabeni saseNyanga, wokudinga indlela zokusebenzelana ukuthuthukisa imisebenzi yokukhankaselwa kwemihlobo yokwelamisela katshana,engasetshenziswa nguzulu,ukwelamisela katshana kanye lokuzivikela kumagciwane awehlukeneyo okubalisa ele HIV kanye lelibangela imvukuzane yomlomo wesibeletho okugoqela i condom labesifazane.
Okhokhela uhlangothi lwezokukhankaselwa kwalokho okutholakala kulenhlanganiso kanye lokukhulumisana lozulu– Marketing and Communications Manager,umnumzana Simion Chikwizo,utshele intathelizndaba ukuba bakubone kufanele njengenhlanganiso ukuba balusungule loluhlelo lokusebenzelana lozulu,lwe Home Meeting Stratergy,kuzigaba ezintathu ezibalisa i Matebeleland North,Masvingo kanye laseManicaland.
Uveze ukuba bakhethe ukuqala ngalezi zigaba ngezizatho ezimbalwa okubalisa indlela uzulu wakulezi zigaba wemukela njalo ezinye zenhlelo zabo okufana lemihlobo yamacondom ( Mat North ),ukuqansa kwenani labatholakala belemikhuhlane yemacansini ( Masvingo ) kanye lokuba babafinyelele kanjani abezokholo abangathakazeleli ukuphatheka kunhlelo zezempilakahle ( Manicaland ).
Abe ZNFPC bathi kuqakathekile njalo ukuba intathelizindaba ziphatheke lakumikhankaso ngokuloba indaba eziphathisa ukwazisa uzulu phezu kwemihlobo yokwelamisela katshana kanye lokuzivikela kumikhuhlane,ezingasetshenziswa yizithandani,zokulondoloza izimhuli kanye lokwehliswa kokusabalala kwamagciwane abalisa ele HIV okubalisa ukusokwa kwabobaba.
Obona ngezokuqhutshwa kwemisebenzi kuhlangothi olukhankasela ukusokwa kwabesilisa – National Coordinator,Male Circumcision kugatsha lwezempilakahle lokulondolozwa kwabantwana umnumzana Sinokuthemba Xaba uthi luqhuba kuhle lolohlelo lokusokwa oluqhutshwa nguhulumenda nxa kukhangelwa inombolo zalabo abasokwayo.
Ugcizelele njalo ukuqakatheka kokukuba abesifazane bakhuthalele ukulisebenzisa leli condom le FC2 ethi ngoba liqondane labo,kumizamo yokubavikela kundaba zokwelamisela katshana kanye lokuzivikela kumagciwane okunje ngele HIV lalawo abangela ukuthelelanwa kwemikhuhlane yemacansini.
Lindlela yokusebenzelana lozulu wemaphandleni luza ngemva kokunanzelela ukuba lokhe zikhona izikhexe kuzulu ikakhulu abesifazane,ezibangele ukungathakazelelwa kwalelicondom labomama ele FC2 selokhu lasungulwayo.
Abe ZNFPC bathi loluhlelo lwakuqala – Pilot Project lolu,lokusebenzelana lozulu wemaphandleni kulezi zigaba zontathu uqale ngenyanga ka Mabasa kuwonalo umnyaka njalo lukhangelelwe ukuphela ngenyanga inye kumnyaka ozayo ngokuphathiswa ngosizo ngabenhlanganiso ye Female Health Company.
Luzakuqhutshwa ilizwe lonke ngemnyaka ozayo loluhlelo lokusebenzisa indlela yokusebenzelana lozulu ukukhankasela i condom labesifazane ele FC2.