Lusukile njalo uthuli lombango wokuthola abasekeli eMandebeleni phakathi kwamacele omabili eMDC lapho lelo elikhokhelwa nguMnumzana Morgan Tsvangirai, seliveze phambi kukazulu abahlanu esibabamukele bevela kuZANU PF lakucele ekhokhelwa nguMnu Welshman Ncube kukanti lalo seliveze abane phambi kukazulu lisithi bayingxenye yababengabasekeli be MDC-T abangaphezu kwamatshumi amane sebehulubukele kuyo kunyanga ezisanda kwedlula.
Lubikwa beseluke lwathi phothololo uthuli lwalo umbango wabasekeli wona owasukela eNkayi wamemetheka wangena eLupane East laseBulilima East, zona okuyizigaba ezazimelwa ephalamende ngabaxotshwa kuMDC-N oMnumzana Abednico Bhebhe, Njabuliso Mguni kanye lo Norman Mpofu ngokulandelana kwezigaba. Kubika intathelizindaba yeStudio Seven uThabang Mathebula.
