Inhlanganiso yeSadc ithi izathumela iqula layo eHarare kuliviki ukuyasebenzelana logatsha lweJomic emizameni yokulungisisa okuhluphayo kuhulumende womanyano andubana kwenziwe ukhetho olukhululekileyo elizweni.
Iqula leli lilamalunga avela emazweni akugatsha lweSadc Troika abalisa eleSouth Africa, Zambia leMozambique. Inkokheli yeSadc ehlangane eSouth Africa ngempelaviki yiyo ekhuthaze ukuthi iqula leli lithunyelwe ngokuphangisa.
ISadc ixwayise njalo amabandla akuhulumende womanyano ukuthi agcwalise isivumelwano seGlobal Political Agreement lokuthi acande indlela yokhetho ecacileyo.
Abamela iZanu PF leMDC bavumelene ukuthi babe sebeqedile ukuwuhlela lumhlahlandlela kunyanga ezimbili ezizayo lapho abazabuyela lawo njalo kuSadc.
Umkhokheli weMDC uMnu Welshman Ncube, utshele lumsakazo ukuthi ibandla lakhe selikhangelele ukuthi isivumelwano seGPA sigcwalisiswe ngoba sokumbalwa okulokhu kungakafezwa.
Isikhulumeli seZanu PF uMnu Rugare Gumbo uthe imilayo ethulwe yiSadc ihambelana xathu lezifiso zebandla lakhe, esithi konke okuhluphayo kumele kulungiswe ngokuphangisa kuyiwe kukhetho.
