Ibandla leMDC ekhokhelwa nguMnu Morgan Tsvangirai liqedise ukhetho lwalo lokudinga inkokheli yalo koBulawayo ngoLwesibili kulokuthula.
Ukhetho lolu besoludluliselwe phambili kabili kulandela udlakela oluqhamuke phakathi kwamacele alwisanayo; elisekelwa nguMnu Gorden Moyo lelikhokhelwa nguMnu Matson Hlalo.
Lelibandla selikhangelele ukuqhuba iNational Congress yalo ngoLwesine. Kulumhlangano uMnu Tsvangirai uzakhethwa eqhubeka ekhokhela lelibandla.
Izikhundla ezikhangelelwe kakhulu ngabanengi zigoqela esikamgcinisihlalo webandla lapho ophethe lesisikhundla uMnu Lovemore Moyo azangqikilana loNkosikazi Lucia Matibenga.
Kukhetho lokudinga unobhala jikelele uMnu Tendai Biti, yena okulesisikhundla uzalwisana loMnu Eliphas Mukonoweshuro.
Kukhetho lokudinga umabhalane, obona ngokuqoqwa kwenhlelo zebandla uMnu Elias Mudziri uzangqikilana loMnu Nelson Chamisa.
UMnu Abednico Bhebhe uzancintisana loMnu Thamsanqa Mahlangu kusikhundla somsekeli kamabhalane wenhlelo zebandla.
Umhlangano weCongress lo uza kulokudonselana okukhulu kulelibandla kanye lodlakela amalunga elwisana ebanga izikhundla. Inengi lithi iMDC kaTsvangirai ayisatshiyananga leZanu PF.
