amalinks wokungena

Breaking News

Kuyaqhubeka Ukuhlukunyezwa Kwentatheli ZeStandard


Kembo Mohadi
Kembo Mohadi

Intathelizindaba zeStandard ezibotshwe ngeviki edluleyo zisetheswa icala lokuhlambaza umcebisi weReserve Bank zetheswe elinye njalo icala ngoLwesibili lokungcolisa igama lesiphathamandla seZanu PF uMnu Kembo Mohadi.

UMohandi ngomunye njalo wabamphathintambo ababona ngendaba zaphakathi kwelizwe.

Umhleli waleliphepha uMnu Nevanji Madanhire lentatheli uMnu Nqaba Matshazi betheswa icala lokungcolisa uMohadi kulandela udaba olulotshwe ngumatshazi mhlaka 1 ngoMfumfu olokuthi uphakathi kombango wepulazi lezakhamizi zeBeitbridge. Ababili laba khona bezakwaziswa ukuba icala labo lizathoniswa nini.

Umgcinisihlalo weMisa-Zimbabwe uMnu Njabulo Ncube usole amapholisa ngokuhlukuluza uMatshazi loMadanhire. Amazwi akhe agcizelelwe ngunobhala jikelele weZimbabwe Union of Journalists uMnu Foster Dongozi.

Kunjalo nje idale lephalemande lakweleSouth Africa lipase umthetho ngoLwesibili osolwa ngabanengi oweState Security Information Bill. Lumthetho ujonge ukujesiza intathelizindaba eziveza imfihlo kahulumende.

Abasole umthetho lo bagoqela uArchbishop Desmond Tutu, ihofisi kaMnu Nelson Mandela, osomabhizimusi kanye lentathelizindaba zeSouth Africa lezeZimbabwe.

Abavotele lumthetho ngabebandla elibusayo eleAfrican National Congress kuphela, njalo abamanye amabandla bawuphikisile.

Abanye bathi umthetho lo awutshiyananga loweZimbabwe othiwa yiAccess to Information and Protection of Privacy Act (Aippa), wona osetshenziswa nguhulumende ukuhlukuluza intatheli zamaphephandaba lemisakazo ezimeleyo.

XS
SM
MD
LG