Ababalisi bathi kabasamukeli isilinganiso sokulitshumi lanhlanu ekhulwini uhulumende akhweze ngaso iholo labo ngoba sisincane kakhulu.
Inhlanganiso ezimela ababalisi ezigoqela iZimbabwe Teachers Association, iProgressive Teachers Union of Zimbabwe kanye leAmalgamated Rural Teachers Union of Zimbabwe zihlangene zaphuma lesinqumo lesi ngoLwesibili.
Zithi zifuna iholo lazo lengezelelwe ngesilinganiso esifika kumbe esedlula amatshumi amahlanu ekhulwini, i50 percent.
Uhulumende wazise ngoMvulo ukuthi usekhuphule iholo lezisebenzi zakhe zonke kuqala ngoNtulikazi.
Isiphathamandla seZIMTA uMnu Sifiso Ndlovu utshele iStudio 7 ukuthi njengoba ababalisi bengamukela imali le, bazaqhubeka bekhulumisana lohulumende ngoLwesithathu.
Ukuhlaziya loludaba sixhume ingcwethi kwezenotho uMnu Rejoice Ngwenya yena othi uhulumende weZanu PF ulayo imali kodwa kafuni kafuni nje ukubhadala izisebenzi zakhe.