Igqwetha kundaba zesisekelo sombuso, uMnu Welshman Ncube uthi uMongameli Emmerson Mnangagwa wephule umthetho ngokumemezela ilanga lokhetho uluhlu lwe-voters' roll lungakethulwa.
UMnangagwa wazise ngoLwesithathu ukuthi ukhetho lokudinga uMongameli, amalunga edale lephalamende lamakhansila luzakwenziwa mhlaka 30 ngoNtulikazi.
Umthethwandaba owamukela amaphepha abancintisayo oweNomination Court wona uzahlala mhlaka 14 ngoNhlangula.
Kodwa uNcube, ongumkhokheli weMDC uthi uMnangagwa wephule isisekelo sombuso kanye lomthetho weElectoral Act ngokumemezela ilanga lokhetho iZimbabwe Electoral Commission ingakethuli i-voters’ roll.
Ngokunjalo, uMnu Ncube uthi balakho ukumangalela uMnangagwa emthethwandaba njengomanyano weMDC Alliance.
“Nxa ususenza iproclamation uyabe ususithi i-voters’ roll isikhona, isiphelele, ilungile,” kutsho uMnu Ncube.
“Kumele ukuthi ngabe ngiyahamba kuZEC namhlanje ngifike ngithi ngicela ivoters’ roll banginike. Lapha uMnangagwa wephule isisekelo sombuso leElectoral Act.”
UMnangagwa uthe ukuthi nxa kungasabanga lomuntu onqobileyo kukhetho lukaMongameli, lolukhetho luzaphindwa (run-off) mhlaka 8 ngenyanga kaMpandula.