Uzulu wamukele ngenjabulo isinqumo somthethwandaba esivimba ibandla leZanu PF ukuthi libambe abantwana besikolo lababalisi ngamandla ukuya emihlanganweni yalelibandla.
Umahluleli weHigh Court unqume ngoLwesine ukuthi lelibandla kalimelanga lisebenzise yiloba yiphi impahla yesikolo, egoqela amabhasi, izitulo lokunye.
Inhlanganiso yababalisi bemaphandleni iAmalgamated Rural Teachers Union of Zimbabwe (ARTUZ) lenhlanganiso yeVeritas yizo ezihambise udaba lolu enkantolo.
Inkulungwane zabafundi zitshona zigcwele emihlanganweni yeZanu PF zitshiyiswa izifundo ikakhulu nxa kuloMongameli Emmerson Mnangagwa.
Isiphathamandla seMDC-T ekhokhelwa nguNkosazana Thokozani Khupe eMelika uMnu Muzobanzi Ncube utshele iStudio 7 ukuthi le yinto esimele iphele nanku inkundla isikhulumile.
