Ukwethuselwa kwabantu ngamalunga ebandla leZanu PF lokuncitshwa ukudla kwabasekeli bamabandla aphikisayo kubikwa kusanda endaweni ezitshiyeneyo zelizwe.
Lokhu kufakazwa zinhlanganiso ezizimeleyo ezifana leZimbabwe Peace Project (ZPP).
IZPP ithi kulosobhuku owatshaywa watshiselwa indlu ngabasekeli bebandla leZanu PF eHurungwe North ngeviki edlulileyo ngemva kokutshela izakhamizi ukuthi zingavumi ukwethuselwa.
Igama likasobhuku lo nguMnu Canciwell Masanga.
EBuhera ukhansila weZanu PF uMnu Tarisai Nganga ubikwa ethathele ugatsha lweSocial Welfare ukudla wakwabela abasekeli beZanu PF kuphela.
Le yinto esolwe kakhulu ngabalwela amalungelo oluntu kanye lesikhulumeli sikaMnu Nelson Chamisa, uDr Nkululeko Sibanda.
Ilunga leZanu PF uMnu Gadzira Chirumanzu ukulandule ukuthi ibandla lakhe liphatheke kumisebenzi yodlakela lokwethusela uzulu.