amalinks wokungena

Breaking News

Iqembu leBulawayo City Liphiwa Imvunulo yiAsphalt Products


Iqembu leBulawayo City seliphiwe impahla yokusebenzisa nxa lizilolonga lalapho selidlala lamanye amaqembu ngaphambilini kokuqala kwehlandla lesibili elemidlalo yalonyaka eyeCastle Lager Premier Soccer League.

Impahla le ingena kunkulungwane ezintathu zamadola njalo ivele kunkampani yeAsphalt Products.

Ekhuluma emkhosini wokwethulwa kwalesisipho, unobhala jikelele weqembu leBulawayo City uHorace Ndubiwa uthe akusikho okwakuqala ukuthi abeAsphalt Products baphathise iqembu labo.

Wengeze wathi ubudlelwano bbao baqala ngomnyaka ka2016.

“Silwamukela ngezandla zombili usekelo esilutholileyo ikakhulu njengoba siphila ngensuku ezinzima kangaka kwezomnotho elizweni usekelo lwemali lungatholakali lula,” kutsho uNdubiwa.

Iqembu leBulawayo City lihlezi endaweni yetshumi lane engalaneni yemiklomelo njalo lilemiklomelo elitshumi lane.

NgeSonto leliqembu lizavakatshela enkabazwe ukuyadlala leqembu leChapungu lona elihlezi endaweni yesibili nxa usuka ngaphansi kwengalane kodwa esehlukaniswa ngumklomelo owodwa kuphela.

Kunjalo nje, iqembu lePakistan linqobe eleAustralia ngama-runs angamatshumi amane lanhlanu emdlalweni wesihlanu womncintiswano weTri-Nation Series oqhutshelwa eHarare.

EleZimbabwe ligunyulwe yiPakistan kulumncintiswano ngoLwesithathu.

IPakistan leAustralia yizo esezifinyelele ukuyadlala ku-final yalimidlalo ezadlalwa ngeSonto ngemva kokuba zizophisane ukubhaxabula eleZimbabwe emidlalweni eyedlulileyo.

Emdlalweni wakuqala walumncintiswano elePakistan litshaye eleZimbabwe ngama-runs angamatshumi ayisikhombisa lane kwathi kowesibili eleAustralia linqobe elePakistan ngama-wickets ayithobamunwemunye.

Emdlalweni wesithathu iqembu leAustralia linqobe eleZimbabwe ngama-runs alikhulu.

Kowesine elePakistan litshaye eleZimbabwe ngama-wickets ayisikhombisa kwathi ngoLwesine elePakistan laphindisela ukunqotshwa yiAustralia emdlalweni wesibili owomncintiswano lanqoba ngama-runs angamatshumi amane lanhlanu.

NgoLwesihlanu iqembu leZimbabwe lizadlala leleAustralia kuthi ngeSonto eleAustralia lelePakistan azangqikilana sekudingwa intshantshu.

please wait

No media source currently available

0:00 0:02:22 0:00

Facebook Forum

XS
SM
MD
LG