Inhlanganiso ekhankasela ukulondolozwa kwamalungelo oluntu emhlabeni jikelele, iHuman Rights Watch, ithi ukuhlukuluzwa kwamalunga omanyano weMDC Alliance ngamasotsha lamapholisa kuyadlondlobala elizweni.
Embikweni ewethule ekuseni namuhla, inhlanganiso le ixwayise uhulumende kaMongameli Emmerson Mnangagwa ukuthi amise ubudlova lobu ngokuphangisa.
Ithi njalo amalunga eMDC alliance amanengi asebalekile ezindlini lemizini yawo ngoba ezingelwa ngamabutho, amapholisa kanye labantu abahlomileyo abangagqokanga amayunifomu.
Amapholisa athi adinga amalunga alumanyano agoqela uMnu Tendai Biti, uMnu Morgan Komichi, uHappymore Chidziva, uJim Kunaka, uPaddington Japajapa, uMafaiti Mubaiwa, Jeff Tafadzwa Chaitezvi, uMnu Lovejoy Chitengu loChamunorwa Madya.
Amapholisa ethesa abantu laba icala lokuphehla udlakela oluqhamuke eHarare ngeviki edluleyo ngesikhathi abasekeli beMDC Alliance betshengisela eziladeni besola impumela yokhetho besithi kube lokuqilibezela.
Umqondisi weHuman Rights Watch ezansi yezwekazi leAfrica uMnu Dewa Mavhinga uthi imota kaMnu Biti idutshuliwe ngamasotsha, wona abulale abantu abayisithupha ngeviki edluleyo.
Ingcwethi kwezombusazwe uMnu Effie Dlela Ncube uthi ucuku lwamasotsha lamapholisa lolu luveza sobala ukuthi uMnangagwa loMugabe zimbila zantabanye.
Facebook Forum