Abenhlanganiso yomanyano wezisebenzi owe Zimbabwe Congress of Trade Unions bakhuthaza uzulu ukuba amanyane labo ekutshengiseleni okuqoqwa ukwenziwa ilizwe lonke ngoLwesine bekhonona phezu kwendlela esezisetshenziswa nguhulumende ukulungisisa umnotho welizwe abathi seziphazamisa impilo zabanengi.
Bathi bazakwenza lokhu lanxa amapholisa esithi awabaphi imvumo yokutshengisela ngoba kungafunakali ukugcwala kwabantu kulandela ukuqhamuka komkhuhlane we cholera.
Abe ZCTU bathi uzulu kumele aphume ngobunengi ukuzotshingisela ukuba uhulumende asuse umthelo wamasenti amabili kudollar elisetshenzisiweyo, osekubangele ukuqonga kwentengo yempahla lokudla elizweni lonke jikelele besithi kabalufuni olunye njalo uhlelo lwe ESAP.
Unobhala jikelele we ZCTU uMnu. Japhet Moyo ulandisa kabanzi ngalokhu kutshengisela abakuqoqayo.
“Izisebenzi ziyakhonona,zikhonona kakhulu ngokwenzakalayo kumbe singathi ngohlelo lukahulumende lokubantshontshela imali. Uzulu uyakwazi ukuthi u RBZ kumbe u Reserve Bank of Zimbabwe ndawonye le Ministry of Finance bethule uhlelo lokuthi bangathola njani imali kahulumende. Izisebenzi kazijabuli ke ukuthi uhulumende ubone kuqakathekile ukuthi athathele ke abayanga,” kutsho uMoyo.
U Moyo uthi izisebenzi azivumelani lomthelo we 2c ku dola.
“Asivumelani lokuthi imali zethu esazifaka emabhanga asisoze sizithole kungamadola akweleMelika,sithola ama RTGS. Asivumelani lakho,ayisikho esakwenzayo. Abantu bethu kumbe izisebenzi sibona zitshaywa lapha emigwaqweni ngamapholisa,esibabiza ngokuthi baku informal economy,asivumelani lakho lokho. Uhulumende ukwenze nje engazange azame ukuthi abuye lohlelo lwakhe ku Tripartite Negotiating Forum lapha esihlafuna khona indaba ezithize ezihlupha ke umbangazwe. Yikho nje silungiselela ukuthi sitshengisele ngoLweSine,” kutsho uMoyo.
Inengi lenkokheli zamabandla ezombusazwe aphikisayo okubalisa ele Economic National Democratic Party – ENDP athi avumelana lenyathelo labe ZCTU ukukhokhela uzulu ekutshengiseleni ukukhonona ngezinqumo zikahulumende asezithatha emizameni yokuvuselela umnotho.
U mkhokheli weENDP umnumzana Thabani Tigere uthi usekela abe ZCTU kuleli nyathelo.
“Singabe lokhe sibanjelelwa sizithulele kuzakwenza njengani kuthiwa izinto eZimbabwe zilungile zi right kodwa umuntu wonke ngaphandle uyakhala. So zingasukuma sonke,mina ngithi abantu bonke kasisukumeni siyobambana izandla labe ZCTU siyenze i march. Noba kungelani okuzosilethela khona ngoba siyazi ukuthi abantu laba balenhliziyo ezimbi kodwa kasiphumeni ngobunengi bethu basibone sikhona ezitaladeni ukuthi asikufuni asikuvumelanga thina lokho okwenzakalayo, asikuthandi asikuthakazeleli. Kodwa kasiphumeni, siyakwazi abalandlebe zokulalela laba bantu,abasilaleli but kodwa kasiphumeni. Lats time just after ma elections,abantu bazama ukutshengisela basibulala. Siyakwazi khonapha ukuthi bangenza something kodwa akusoze kusiqede sikhona, bebulala lowana kuyasala kuvuka omunye,” kutsho uTigere.
U Tigere uchaze umongameli Emmerson Mnangagwa njengomuntu ongalaleliyo izikhalazo zikazulu ilizwe lonke.
“Abantu bayakhala ngaphandle lapha,emakhaya,emadolobheni, sekufana. Amanzi khathesi ungakhangela,ngitsho amanzi generally khathesi ngendaba ye cholera ekhona,umuntu uyathwala amanzi ngenkonxa ekhanda. Akusatshiyananga emaphandleni le town,sekufana nje. Ukulalela kwakhe ukuthi athi the voice of the people is the voice of God,ukulalela njani nxa engasilaleli thina esikutshoyo,engakulandeli esikutshoyo?. Khathesi wa riga ama elections angitsho,ngabe ulalela,ulosizi labantu,ngabe wavuma phela ukuthi udliwe. Ukungavumi kwakhe khonokho yikho okutsho ukuthi kalaleli okutshiwo ngabantu. Abantu bafaka ama X batsho ukuthi lokhu asikufuni sifuna lokhu,” kutsho uTigere.
Abe ZCTU bathi lokhu yikuqala kwenhlelo zokutshengisela ezizoqhubeka zisenziwa uhulumende aze alalele izikhalazo zikazulu.
Nxa engaqhubeka eqinisa ikhanda uhulumende, engalaleli okutshiwo ngabantu, abe ZCTU bathi kuyabe kungasekho ngenye indlela ngaphandle kokuphazamisa isimo elizweni kungaze kwaba lokwenziwayo.
Kodwa amapholisa ahle abhala incwadi yokuvimba lokhu kutshengisela bekhumbuza abe ZCTU phezu kokwethulwa ngabogatsha lwentuthuko yezabelo lamadolobho ukuvimba imibuthano njengendlela yokwenqabela ukusabalala komkhuhlane wesihudo seCholera.
Encwadini elotshwe ngu Assistant Commissioner Paul Nyathi we Police General Headquarters, amapholisa exwayisa abe ZCTU ukuba bangaze
baqhubeka ngokutshengisela kwangoLweSine.
