Ukuswelakala kwemali lemithi yokwelapha abagaluyayo ezibhedlela sokwenzwe izizalwane zeZimbabwe ezihlala eBhilithane zibe lokwethuka lokwesabela izihlobo ezigulayo ekhaya langendlala esingenile osekubangele ukuthi labosiphatheleni bakwele Bhilitane bahlabe umkhosi. Okunengi asikuzweni kuntathelizindaba yeStudio 7 uEzra Tshisa Sibanda ese Bhilitane.
Iwa ivuka ibond ngenxa yokusweleka kwemali yanga phandle kwelizwe. Lokhu sokwenze ukuthi abatshintsha imali bese Bhilitane, osiphatheleni phela, balahlekwe yimali enengi kubangelwa yikukhwela lokuqansa kwesisindo semali yohlobo lwebond.
UNkosazana Ngirivane Ndlovu ngusiphatheleni weNglandi onceda abantu ukuthumela imali ekhaya
Kutsho uNgirivane: “Bengintshintsha imali nge 1 is to 4 amabond, nginika abantu imali enengi kulokuthi ngobanike elutshwana. Manje imali osisuke yawa, soku ngi luzisile khonokho, sengize ngicabanga lokuthi ngime ibusiness kancane ngoba bekumele ngobanike imali encane kodwa mina bengi bapha enengi.”
UMnu. Canaan Moyo uyagulelwa eZimbabwe njalo seswele ukuthi enzeni ngemithi engatholakaliyo
“Okusekhaya eZimbabwe kunzima. Abakhokheli bethi baqamba amanga betshela umhlaba wonke intwe ngekho, bathi izinto zase Zimbabwe zonke zilungile. Bona bengagula, balemali, bayaphuma bayekwelatshwa emazweni ngaphandle. Mina ngilo malumami ongela mali yokuthi ayekwelatshwa ngaphandle. Langaze umdingele okuyi madlana khonokho okuncane, ema chemestry akhona, akula mithi, akula lutho. Kodwa bona bayabe betshela umhlaba bethi yonke into ilungile beqamba amanga,” kutsho uMoyo.
UNkosazana Chele Dlamini ongomunye ogulelwayo laye uyafakaza
“Mina ngilo mamomdala wami, ukhulile and ule BP. Bengi mnceda ngoku mthengela amaphilisi ekhaya manje akhwelile intengo yakhona and angazi bakithi ukuthi senzenjani. Siyaze sifelwe ngabadala ekhaya. So sokusithi ke sokumele ngiqale ukudinga abantu njengoba mina ngingekho ekhaya sokumele ngiqale ukudinga abantu ke abase South Africa, abazo thenga behambisa. Noma etholakala eSouth Africa but khona lokho ukuthi ukuthola abantu futhi uthumeza ngesinye futhi istress. Ayi!” kutsho uDlamini.
Umnunzana Alexander Ndoda uthi abaphathi yibo abenza imali iswelakale ngoba yibo abanikazi beBlack Market
“Sokulohlupho olukhulu sibili, ngoba khathesi ma sithumela imali, imali yakhona kayisekho, abantu bayilindela amalanga amanengi. Lanxa isithathwa besithi bayayithatha sokuthiwa nxa bengayisebenzisa kumbe batshintshe ngamabond lawo imali sihamba siphela. Sokulalokho abakuthi yikuspinner imali. iBlack market kayime, yiyo esilethe udubo kakhulu,” kutsho uNdoda.
Izizalwane zeZimbabwe zithi azazi ukuthi zenzeni ngomumo oselizweni ikakhulu abagulelwayo bathi kulobunzima njalo sebephelelwe ukuthi basize njani lokuthi benzenjani ukuthi bancedise izihlobo zabo ngoba imali dololo ekhaya.
