amalinks wokungena

Breaking News

"Ukwelamisa Imuli Kwalezinsuku Kunciphisa Imizi Kakhulu"


UNkosikazi Siphiwe Chabikwa, owenhlanganiso yeZimbabwe National Family Planning.

Ingcwethi kwezempilakahle ziveze ukuba indaba zokwelamisa kuhle imuli, kulilungelo lomuntu wonke njalo kungumthwalo kahulumende ukwenza lifezeke lelo lungelo.

Lokhu ngokunye kokuvezwe zingcwethi zezempilakahle ezisebenzelana lenhlanganiso ye United Nations Population Fund – UNFPA imanyene leye Zimbabwe National Family Planning Council - ZNFPC emhlanganweni lentathelizindaba owenzelwe ehoteleni ye Golden Peacock edolobheni le Mutare.

Emazwini ethulwe ngobona ngenhlelo zendlela eziphathelene ngokwelamisa kuhle imhuli, enhlanganisweni yeUNFPA, u Dr Raghuvanshi Vibhavendra uthi kungalesi sizatho ke kumele luqakathekiswe loluhlangothi.

“Lanxa sililizwe eselilenani eliphezulu labantu abanelisa ukufinyelela lezindlela zokwelamisela khatshana basesekhona abesifazane abafisa ukuzisebenzisa lezondlela kodwa besehluleka hatshi ngokuthanda kwabo kodwa ngenxa yemigoqo eba khona ekuthini benze lokho. Ngenye indlela lokhu kusitsho ukuba zisesekhona izikhexe kwezokutholiswa lezondlela kubesifazane elizweni,” kutsho uVibhavendra.

Uzulu okubalisa umnumzana Nkosikhona Dibidi uvemalana lalombono ethi ngoba ilondoloza impilakahle yabantu kakhulukazi abesifazane.

“Kudala sisakhula sasisazi ukuthi abazali bethu babezalwa babe ngu 9 kwesinye isikhathi bebe ngu 10 kumama oyedwa. Okwakhathesi izinto sezintshintshile omama sebezama labo ukuthi bazithuthukise, bangene labo baye ezikolo basebenze emakhampanini lapha. Sekubangela ukuthi i family planning ibe nengi kakhulu. Kodwa ke sekusiya ngokuthi izimhuli ngezimhuli bafuna ukuthi benze njani ngoba kuyabe kuncedisa ukuthi abantu bezwisisane ukuthi ekubeni labantwana lapha sikhangelele ukuthi umama laye athole ukuthi uyakwanisa ukuthi enze imisebenzi yakhe afisa ukuyenza anelise laye ukufeza lokho afuna ukukwenza kungakhathalekile ukuthi ngumama womuzi,” kutsho uDibihi.

Ngaphandle kokulondoloza impilakahle yowesifazane, U Dibidi uthi ukwelamisela katshana kusiza ekuthi owesifazane laye athulo ithuba lokuzithuthukisa ngendlela ezehlukeneyo okuphathia ekuthuthukiseni isizwe sonke.

“Impilo isintshintshile khathesi akusafani lakudala ukuthi abantu babezalwa bebanengi egumeni. Khathesi amaguma semalutshwana ngoba abantu babhizi baya le lale lezimhuli zizisiya zifinqa. Khathesi sesilabo cost of living laba abangaba yimbangela yokuthi i family planning isetshenziswe kakhulu. I family planning isiqakatheke kakhulu,isikhona kakhulu kulezinsuku zalamuhlanje ngoba obaba labomama babhizi ngezinye izinto ezitshiye tshiyeneyo. Ikakhulu abantu sebekhangela kakhulu indleko eziba khona ekubeni labantwana,izinto ezinje ngazonalezo,” kutsho uDibidi.

Lanxa kungumlandu kahulumende ukulondoloza ilungelo lohlangothi lwezokwelamisa kuhle imuli, ingcwethi kwezempilakahle zithi uzulu laye ulehlandla okumele alidlale okubalisa ukudinga usizo nxa ethe wadibana lenkinga kulokhu.

please wait

No media source currently available

0:00 0:02:32 0:00

Facebook Forum

XS
SM
MD
LG