amalinks wokungena

Breaking News

Ibandla leDA ele South Africa Lethula Umkhankaso Owethusa Abokuza


Umkhokheli webandla le Democratic Alliance ye South Africa, uMnu. Musi Maimane.
Umkhokheli webandla le Democratic Alliance ye South Africa, uMnu. Musi Maimane.

Ibandla elikhulu aliphikisayo kweleSouth Africa eleDemocratic Alliance selisungule umkhankaso wezokhetho okhuthaza ukubotshwa lokubuyiselwa emuva kwabokuza abahlala kweleSouth Africa ngokungekho emthethweni. Lumkhankaso usulethe ukwesaba kuzizalwane zakwamanye amazwe ezithi ulakho ukubangela udlakela lwexenophobia.

IDemocratic Alliance ithi ibandla libusayo ele ANC selehlulekile ukulawula ukungena lokuphuma kwabantu elizweni ngakho lona nxa linganqoba ekhethweni oluzayo alisoke livumele kube labahlala kweleSouth Africa ngokungekho emthethweni.

Leli bandla elisekelwa kakhulu ngabamhlophe abanye babo abebesekela uhulumende wobandlululo lithi ukuvunyelwa kwabantu ukuhlala elizwei ngokungekho emthethweni yikho osekubangele izehlakalo zexenophobia njengoba abanye becabanga ukuthi yibo abaqeda imisebenzi lezinye inhlelo eziphiwa abantu mahala nguhulumende.

Okhulumela leli bandla kwezokungena lokuphuma kwabantu elizweni umnumnzana Jacques Julius, uthi iDA yiyo yodwa engaqeda ingxabangxoza yabangena elizweni ngokungekho emthethweni.

“Sizababopha, sibavalele sibabuyisele emazweni abo bonke abaqhubeka bengena elizweni ngokungekho emthethweni. Sizakuba leqiniso ukuthi abaselizweni ngokungekho emthethweni bayakulungisa lokho kuthi labo abangelamvumo yokulungisa sibancedise ukuphuma elizweni,” kutsho uJulius.

Phansi kohlelo lwayo iDA ithi izaqinisa umthetho emingceleni, yengeze indawo zokungena elizweni, iqede inkohlakalo njalo ifundise butsha iziphathamandla ezisebenzela emigceleni. Isiphathamandla saleli bandla obuya njalo abenguMeya wedolobho lePretoria umnumnza Solly Msimang uthi lo ngukhankaso abawenza ngemva kokuhamba endaweni ezinengi besizwa izikhalao sikazulu.

“Isabelo seGauteng siyehluleka ukupha izizalwane zakuleli inhlelo okufuze izethule ngenxa yokuthi sekulabantu abanengi abeza lapha bevela kwezinye izabelo kanti khathesi sesilabanengi abangene elizweni ngokungekho emthethweni asebegcwele emadolobheni esabelo seGauteng,” kutsho uMsimang.

Lumkhankaso ususolwe kakhulu yizizalwane zakwamanye amazwe kanye lenhlanganiso zamalungelo oluntu.

Inhlanganiso yamaqwetha ezamalungelo oluntu eye Lawyers for Human Rights isixwayise ngelithi lumkhankaso uzabangela ukuhlaselwa kwabakwamanye amazwe.

Isizalwane seZimbabwe umnumnzana Lebani Nkomazana uthi lo umkhankaso ukhombisa ukuthi iDA libandla eliyingozi nxa linganqoba ekhethweni lomnyaka ozayo.

“IDemocratic Alliance iyabonisa ukuthi ikhul ilalo ubandlululo lwama Africa njalo kubonisa ukuthi njengebandla elikhulayo ma kuyikuthi iDA ingakhokhela leli lizwe ingabalenkinga yokubambanisa ama Africa jikelele ngoba isihle yaqala phansi ngobandlululo olukhulu kangaka,” kutsho uNkomazana.

IDA ithi phansi kohlelo lwayo lolu nxa inqobile ekhethweni lomnyaka ozayo izakupha ithuba lokuthi wonke oselizweni ngokungekho emthethweni azobhalisa athole imvumo besekusithi abangelalungelo lokuthola leyo mvumo babuyele emazweni abo.

Lobanje uhulumende ubengakaphenduli ngomkhankaso weDA lo, ngaphambilini ucine esenza umhlangano loMeya weJohannesburg olilunga leDA emkhuza ngenkulumo ezifana lale esithi ziyisisusa sexenophobia.

please wait

No media source currently available

0:00 0:03:30 0:00

XS
SM
MD
LG