Ukusilela kwemali yakwamanye amazwe sekubone amakampani akubhizimusi yokuthumela imali akweleBotswana, exwayisa labo abafisa ukuthumela imali eZimbabwe, ukuthi baqale babuze ukuthi imali ikhona na lapho abazathathela khona.
Abanye abeZimbabwe abakweleBotswana bathi izihlobo labangane abatholi imali ngesikhathi, ngenxa yodubo lokusilela kwemali yakwamanye amazwe.
Amakampani akubhizimusi yokuthumela imali afana leWestern Union Money Gram lamanye, athi abafisa ukuthumela imali eZimbabwe kumele baqale badingisise ukuthi ikhona na, lapho abathathela khona leyomali.
Izisebenzi emankampanini lawa zithi abalamandla ngokwenzakala eZimbabwe, kodwa abangakwenza yikuthi baxhwayise abathumela imali eZimbabwe ukuthi baqale badingisise ukuthi labo abathunyelwa imali bazayithola na.
AbeWestern Union bathi kunzima ukubamba udaba lweZimbabwe, ngoba isimo sakhona siguquka nsuku zonke.
Kulamakampani ambalwa, agoqela ekamakhal’ekhukhwini eye Orange Botswana, iMukuru, Western Union, kanye le Money Gram, ebesezibone igolide ngebhizimusi lokuthumela imali eZimbabwe. Kodwa bakhala ngokuthi isimo seZimbabwe, lapho okusilela imali yakwamanye amazwe, ikakhulu idola leMelika, sekuthundubeze uthando lwabantu abafisa ukuthumeza imali besebenzisa amakampani la.
Umnunzana Siphesihle Ndlovu, uthi yena uke wathumela imali ekhaya kwathatha isikhathi eside ukuthi izihlobo ziyithole…
"Ekhaya bayakhala bathi kwesinye isikhathi imali oyithumelayo ifika ingalingani, betshelwa ukuthi bezothatha eseleyo, ngelinye ilanga. Kwamanye amalanga kuthiwa akulamali, kodwa wena uyabe uthumele ukuthi isentshenziswe khonapho," kutsho uNdlovu.
Okukhathaza abafana lonkosikazi Abigail Hlatshwayo yikuthi kwesinye isikhathi, akulasixwayiso sokuthi izihlobo azingeke zathola imali khonapho khonapho…
"Amanye amakampani awasitsheli ukuthi abenelisi ukupha esibathumelayo imali. Sicina sisizwa ngabasekhaya ukuthi bayehluleka ukuthola usizo ngesikhathi," kutsho uHlatshwayo.
IWestern Union, kumbiko ophume kuphephandaba leStandard ngempelaviki, ithi ukusilela kwemali eZimbabwe sekufake inkampani le engxakini.
Inkampani le ithi kuzamele inekeze ingatsha zayo eZimbabwe imali yakwamanye amazwe ukuze zenelise ukuphathisa abadinga usizo.
Kodwa abanye sebebona kungcono ukuphathisa emabhasini, kumbe kulabo abayabe besiya eZimbabwe besuka kweleBotswana…
"Sesibuyele kundlela zakudala ezokuphathisa. Noma kungathembekanga ukufaka ebhasini, kungcono ngoba uyakwazi ukuthi umuntu uzayithola imali kungelandaba zokuthi kusilela imali yakwamanye amazwe elizweni," kutsho omunye wabo.
Imali evela phandle kwelizwe inceda kakhulu ekuthuthukiseni umnotho welizwe, kulezigidi lezigidi ezithunyelwa ngabeZimbabwe abahlala phandle kwelizwe minyaka yonke.
Kwamanye amakampani kweleBotswana, leli kwabalithuba elihle elokuvula amabhizimusi wokuthumela imali, noma nje khathesi ikusasa yakhona inganhle.
