amalinks wokungena

Breaking News

Uhulumende Wehluleka Ukuya Emhlanganweni Obuphawula Ugwalo Lwenani Labantu Bomhlaba Jikelele eMutare


Umhlaba
Umhlaba

Uhulumende we Zimbabwe wehluleke ukuphatheka emkhosini wokuphawula kogwalo olumumethe okuphezu kwenani labantu emhlabeni jikelele olwe “State of the World Population Report ” emkhosini owenziwe ngasikhathi sinye kugqhitshwa umhlangano wemfudiso zentathelizindaba lapho ziloba indaba eziphathelane lezempilakahle yemacansini lokwelamisa kuhle imhuli, iSexual Reproductive Health ngesingisi.

Li report ephawulwa minyaka yonke ngenyanga kaMfumfu ikhangela ukuba isimo somhlaba wonke ngokuphathelane lenani labantu ukubonisa ukuba aqhuba njani amazwe kumikhankaso aphatheke kiwo.

Eyalonyaka iphawulwe ngaphansi kwesihloko esithi “ THE POWER OF CHOICE, REPRODUCTIVE RIGHTS AND THE DEMOGRAPHIC TRANSITION ” iveza ukuba lanxa eleZimbabwe liqhubeka liqhuba kuhle, isilinganiso sasebesazi lokusebenzisa indlela zokwelamisa kuhle imuli sesikumatshumi phose ayisikhombisa ekhulwini-67% ngakokhe sisesekhona isidingo sokuba iqiniswe imikhankaso ukuze umuntu wonke anelise ukuzisebenzisa.

Obe ngumhlonitshwa emkhosini wokwethulwa kombiko owe “ STATE OF THE WORLD POPULATION REPORT ”, ummeli wenhlanganiso ye UNFPA e Zimbabwe, u Dr Esther Muia ulandisa phezu kwaloludaba.

“Ukwanelisa ukukhetha yikuba lamandla wokuzikhethela lokho okufunayo kanye lendlela yokuzenzela ukhetho phezu kokuba uzokuba labantwana abangaki,nini kanye langokuthi ngemva kwesikhathi esinganani,nxa sikhangela kudaba lokuzikhethela indlela zokwelamisa kuhle imhuli. Amalungelo aphathelane lezokwelamise imhuli kanye lokuthuthukiswa kwabesifazane lokulinganiswa kwamathuba phakathi kwabesifazane labesilisa kuyiyona nsika kwezokuba abantu banengi okunganani elizweni kanye lenhlelo zentuthuko,” kutsho uDr. Muia.

Uqhubeke ethi akubakhathazi ukuba bezingekho iziphathamandla zikahulumende kuloluhlelo.

“Ngiyazi ukuba umphathintambo wezempilakahle ubefisa ukuba khona kulomkhosi kodwa kwehlule ngoba ebambekile. Ubethembele ekuthini unobhala egatsheni alukhokhelayo ebengozokwanelisa ukuza kodwa laye akasaphumelelanga. Ukungabi khona kwabo lapha mathupha akutsho ukuba bengaphathekanga lokuziqakathekisa lezinhlelo,” kutsho uDr. Muia.

Omunye wabongi e kilinika ye Zimbabwe National Family Planning Council – ZNFPC, u Sister Margaret Mashaya ulandisa ngokujabulelwa nguzulu kwezokuhlela kuhle imhuli.

“Ngingathi nje obaba abanengi,siyabona ukuthi ababuya kakhulu emakilinika ngabomama. Obaba babuya nje mbijana mbijana,bephelekezela omama kodwa siyabona ukuthi ngokubafundisa lokubathakazelela,siyabona labo obaba sebefuna ukungena bencedisa omama labo ngendlela ze family planning,” kutsho uMashaya

Abephatheke emikhankasweni yokutholisa ulwazi kundaba zempilakahle yemacansini kanye lokuhlela kuhle imuli bathi usesekhona umsebenzi kwele Zimbabwe ekusetshenzisweni kwendlela zokwelamisa kuhle imhuli.

Bathi kunje isilinganiso sokulitshumi ekhulwini sabesifazane abalemizi yabo bayehluleka ukuzifinyelela lezondlela ngezizatho ezehlukeneyo laloba befisa ukuzisebenzisa.

Umkhosi lapho okuphawulwe khona li report ye “ STATE OF THE WORLD POPULATION REPORT ” ungenwe yiziphathamandla zenhlanganiso ezigoqela eyomanyano wamazwe omhlaba i United Nations Population Fund – UNDP, Zimbabwe National Family Planning Council – ZNFPC, Population Services International, eye Population Services International Zimbabwe kanye lentathelizindaba ebezivele zisemhlanganweni weviki wokuzitholisa ulwazi kundaba zemacansini, impilakahle yezemacansini kanye lezokwelamisa kuhle imhuli.

please wait

No media source currently available

0:00 0:03:04 0:00

XS
SM
MD
LG