amalinks wokungena

Breaking News

Abe Choppies Botswana Sebefuna Ukufuqela uMphoko Phandle


UMnu. Phelekezela Mphoko

Ingxabano ekhona kunkampani yamavinkili eyeChoppies phezu kokuba khona kowayengu msekeli kamongameli weZimbabwe, umnunzana Phelekezela Mphoko lomntanakhe, kulakho ukuphazamisa ukusebenza kuhle kwamavinkili enkampani le kweleZimbabwe kanye leBotswana.

IChoppies iqhatshe izisebenzi ezizinkulungwane ezilitshumi lamakhulu amabili-1,200 ezitolo zeZimbabwe.

Kulandela ukuxokozela phakathi kwenkampani yeChoppies, elamavinkili edlula amatshumi amathathu, njalo iqatshe izisebenzi ezidlula inkulungane ezilitshumi lambili eZimbabwe, kulakho ukulimaza ibhizimusi leli.

Abaqondisi balenkampani, abagoqela owayengumongameli weBotswana umnunzana Festus Mogae kanye lowayengumsekeli kamongameli weZimbabwe, umnunzana Phekezela Mphoko bayalwisana.

Abanye abaqondisi bafuna uMphoko akhitshwe ukuba ngomunye wabanikazi balekampani, kodwa yena uyala.

UMphoko lomntanakhe, uSiqokoqela, yibo ababambe ingxenye ephezulu yemali eyatshalwa kunkampani eyeChoppies yaseZimbabwe.

Kodwa abanye abaqondisi kweleBotswana bathi kumele bephume ngoba kulokunye okungahambanga kahle.

Ukulwisana lokhu sekubone izibambiso zengxenye, ama shares, aweChoppies esikha phansi ngenkamanzi emikhambo yemali kwele Botswana kanye leJohannesburg Stock Exchange esuka ngaphezu kwePula esiyawela kumatshumi amane amaThebe kuphela.

Lokhu kwethuse abanengi, njalo kwesatshelwa ukuba abaqondisi beChoppies bangaqhubeka besilwa, ikusasa yezisebenzi, eZimbabwe kanye laseBotswana, ingaba sengozini.

Omunye ocubungula ngezombusazwe, umnunzana Mbongeni Mguni uthi izehlakalo ezikhona zilakho ukufaka imsebenzi yenkulungwane engozini…

"Ungacabanga ukuthi kulabantu abanengi abaqatshwe yiChoppies. Kungabalento ethunuka ezemali kanye lobudlelwano babaqondisi, kulakho ukufaka imsebenzi engozini. Okwamanje abantu eBotswana kanye leZimbabwe bayazibuza ukuthi kwenzakalani. IChoppies layo ithi ayikwazi ukuthi kwenzakalani," kutsho uMguni.

Uqhubuke esithi udaba lwakhona lwethusa kakhulu ngoba iChoppies yibhizimusi enkulu, njalo khathesi akula olempendulo ukuthi ikusasa ime njani…

"Into yakhona yethusa kakhulu, uma labe Choppies bengakwazi ukuthi kuzahamba njani. Labafaka imali labo sebaphela ithemba yikho ubona ama shares esehla kangaka. Abantu bakhangele ngelihlo elibukhali ukuthi kuzakwenzakalani," kutsho uMguni

Omunye oweZimbabwe osebenza kweleBotswana, umnunzana Ezekiel Tshuma uthi udaba lweChoppies, kumele lulungiswe, ngoba ekhaya kuvele kungela msebenzi, kungaba nzima ngamandla kulabo abasebenza khona uma ukudonselana kungaphelanga.

"Kungaba nzima uma kungabhidlika, ngoba kungaziwa ukuthi kuzahamba njani phambili. Kulakho ukuthi iChoppies iphume kumavikili lapha, ngubani ozangena khonapho yona iZimbabwe ithwele nzima ukuthi ikhange amabhizimusi,” kutsho uTshuma.

USiqokoqela kanye lonkosikazi wakhe bamiswa phambi komthethwandaba koBulawayo ngeviki edluleyo, besetheswa amacala okutshaphaza imali kanye lokuyisebenzisa ngendlela ezingaqondanga.

Lokhu kuzakhathaza njalo abakukampani yeChoppies eZimbabwe, ngoba uSiqokoqela, kanye loyise uMphoko kuyibo abangabaqondisi abakhulu.

UMphoko watshiya isikhundla sokuba ngumsekeli kamongameli ngemva kokukhitshwa kowayengumongameli Robert Mugabe esikhundleni ngoLwezi nyakenye.

please wait

No media source currently available

0:00 0:03:36 0:00

Facebook Forum

XS
SM
MD
LG