UMongameli Emmerson Mnangagwa uthi labo abaloyisa ukuthi kubunjwe uhulumende womanyano bayazikhohlisa ngoba kasoze akuvume lokhu.
UMnangagwa wethule amazwi la ngoLwesine emhlanganweni wedale leZanu PF Central Committee eHarare.
Amazwi akhe aza ngemva kwenkuthazo yomkhokheli weMDC uMnu Nelson Chamisa eyokuthi kumele kubunjwe uhulumende ozaphatha intambo okwesikhatshana ngoba okaMnangagwa esehlulekile ukulungisisa umnotho.
UMnangagwa wengeze wathi uhulumende usebenza gadalala emizameni yokuqeda ukusilela kwezinto ezimqoka empilweni kazulu ezifana lamafutha okuphela lawezimota.
Uthembise njalo uzaqhubeka elwisana lenkohlakalo.
Kunjalo, nje idale leZanu PF Politburo liyalile ukuvumela abaxotshwa kubandla leli nyakenye abathi uMnu Kudzai Chipanga loMnu Innocent Hamandishe ukuthi babuyele kulelibandla.
Kodwa livumele uNkosikazi Annastacia Ndlovu. Bonke laba baxotshwa besetheswa icala lokudlelana lecele elalisekela uNkosikazi Grace Mugabe eleG40.
Ingcwethi kwezombusazwe uMnu Dinizulu Macaphulana utshele iStudio 7 ukuthi ukwala kukaMnangagwa ukusebenzelana lamabandla aphikisayo yinto engamangalisiyo.
