amalinks wokungena

Breaking News

Uzulu Ulembono Ehlukeneyo Ngokuhluthunwa Kombuso Okwenziwa Ngabakubutho


UMnu. Robert Mugabe loNKosikazi wakhe, uGrace phambilini kokususwa embusweni.

Izizalwane zeZimbabwe ziveze imibono ehlukeneyo ngesimo somnotho welizwe lezombusazwe ngemva kokuhluthunelwa kowayengumongameli Robert Mugabe intambo zombuso ngabebutho ngomnyaka odluleyo ngenyanga kaLwezi.

Ngomnyaka odluleyo abebutho bahluthunele owayengumongameli uMnu. Robert Mugabe intambo zombuso ngaphansi kohlelo abalunika isihloko esithi Operation Restore Legacy bethembisa ukulungisa ezomnotho welizwe lezombusazwe, kodwa namhla uzulu asekhala ngakho ethi isimo elizweni sesisibi ukwedlula izolo.

Isikhulumeli seZAPU, uMnu. Iphithule Maphosa uthi abebutho lokhe bephethe intambo zombuso, ezomnotho lezombusazwe.

"Akulanto esingayijabulela kumbe ukuhlonipha ngokuthathwa kombuso noba kwakungekho ngaphansi kesisekelo sombuso, abantu baqhubeka bedubeka, lombuso kaMongameli Emmerson Mnangagwa lokhe ufana lokaMugabe abantu lokhe behlupheka kwaguquka uboso bomuntu osembusweni kuphela," kutsho uMaphosa.

lsakhamuzi sakoBulawayo, uMnu. Thomas Sithole uvumelana loMaphosa ethi kodwa kwezombusazwe kubelenguquko ethize ngoba abantu sebekhuluma bekhululekile kulayizolo.

“Uma sikhangela kusigaba somnotho welizwe kukhanya kulobunzima kakhulu, lomanje ngombuso kaMuabe lakho bekulobunzima, kulo umbuso inteno yempahla iqansile njalo ziyaswelakala emavinkilini. Kwezombusazwe kubelenguquko abantu sebekhululekile ukukhuluma kumisakazo, kumaphephandaba lebulenjini lobanje kulizinga elincane,” kutsho uSithole.

UMnu Lewis Mhlanga uthi abebutho bathembisa amanga ngesikhathi bethatha intambo zombuso ngoba okwenzakala manje kunzima kuyewonke umuntu ezweni.

“Izinto ziyabheda sithwelenzima akulanto elunayo, amafutha emota ayasilela, imithi ayikho ezibhedlela abantu babuzwa imali yemelika engekhoyo, uhulumende lebutho balamanga ngoba abakuthembisayo akukho asebethe bakufeza, ezombusazwe khona kunzima akulanto elungileyo izinto zimi manzonzo ezweni," kutsho uMhlanga.

UNkosazana Joan Nyoni uthi akulanguquko ekhona abayithenjiswayo nyakenye.

“Sesikhangelisisa kuhle akulantshintsho olweznakalayo ezomnotho ziwile kakhulu njalo intengo yempahla iqansile. Kutshengisa ukuba uMongameli Mnangagwa ulezitha asebenza lazo ngoba bathi bekhupha uMugabe embusweni kuzaluna. Kwezombusazwe bayalwa bona bodwa laboCiwenga asazi ukuthi kwenzakalani bathembisana amanga asazi ukuthi bazakulungisa njani nanko thina amaZimbabwean siyadybeka kakhulu ezweni," kutsho uNyoni.

Ngesikhathi abebutho behluthuna intambo zombuso kuMugabe bathembisa ukulungisa wonke umonakalo elizweni kodwa sokungumnyaka lokho ababethi bazakulungisa akukho lokukodwa kwakhona okulungileyo, uzulu uqhubekela phambili edonsa nzima.

Ezomnotho lezombusazwe zimi manzonzo ezweni ukwedlula umbuso kaMugabe.

please wait

No media source currently available

0:00 0:04:17 0:00

Facebook Forum

XS
SM
MD
LG