Lanxa abanye besithi impilo isilukhuni ukwedlula ngesikhathi kusabusa uMnu Robert Mugabe, abanye bathi loba kunjalo, ukususwa kukaMugabe libutho kwakulungile ngoba wayesehlale kakhulu embusweni kanti njalo engasabusi kuhle.
UMugabe wayesebuse okweminyaka engamatshumi amathathu lasikhombisa njalo eseleminyaka yokuzalwa engamatshumi ayithobaminwemibili lantathu.
Ekhuluma le Studio 7 ngoLwesithathu, omele iHwange Central edale lePhalamende uMnu Fortune Molokele owebandla leMDC uthe baphatheka ekususeni uMugabe ngoba kwakulithuba lokuthi ilizwe liqhubekele phambili
“Kwakuqakathekile ukuthi yonke imizamo ihlanganiswe ukuze uMugabe asuke esikhundleni. Ngakho, thina njengeMDC asizisoli ukuthi sasekela ukususwa kukaMugabe embusweni,” kutsho uMnu Molokele.
Amanye amabandla aphikisayo athi asezisola ngokusekela ukugenqulwa kombuso kaMugabe libutho ngoba uMongameli Emmerson Mnangagwa ekhanya engumbusi omubi ukwedlula uMugabe.
“Besikhangelele ukuthi ngalesi isikhathi sizabe sesilombuso wokuthi umuntu wonke uyabe ejabula kodwa ayisikho esikubonayo,” kutsho isikhulumeli sebandla leUnited African National Congress uMnu Alphios Mapuranga.
Wengeze wathi uhulumende kaMnangagwa wehlulekile ukugcwalisa izifiso zabantu abaphatheka ekutshengiseleni okwaqoqwa ngabalwa impi yenkululeko begqugquzela ukuthi uMugabe asuke embusweni.
Amazwi kaMapuranga agcizelelwe ngolwela amalungelo oluntu uNkosikazi Jacqie Nkomo
“Njengenhlanganiso ezivikela amalungelo abantu sananzelela ukuthi ukususwa kukaMugabe kwanika abatsha ithemba lokuthi labo sebengenelisa ukungena kwezombusazwe,” kutsho uMaNkomo.
“Kodwa sinanzelela ukuthi ngemva kwento ezinjengokudutshulwa kwabantu kanye lokhetho olwantshontshwayo inengi labatsha selihle lalahla ithemba, alisaphatheki kwezombusazwe,”
Imizamo yokukhulumisana lamalunga ebandla leZanu PF yehlule.