Ngemva komnyaka uMnu Robert Mugabe ekhitshwe embusweni libutho kwangena uMongameli Emmerson Mnangagwa, izizalwane zeZimbabwe ezikweleSouth Africa zithi selitshabalele ithemba leZimbabwe entsha ezazicabanga ukuthi izalethwa yilinguquko.
“Esikubonayo khathesi yikuthi lawa amadoda aphethe izintambo, kawenzi lutho, azihlalele. Akulalutho abaluzamela abantu,” kutsho umqondisi wenhlanganiso yePhoenix Foundation of Zimbabwe uMnu. Dumisani Nleya.
“Abantu sebeze bekhala besithi uMugabe wayengcono, kusithi kungaba lezinkinga uMugabe azame lokhu akuzamayo labangane bakhe abafana labo China.”
La ngamazwi agcizelelwe ngesinye njalo isizalwane seZimbabwe uMnu Greatman Mkhwebu.
“Into esiyibonayo imihla lamalanga yikuthi ilizwe lilokhu litshona phansi njengesikepe sicwila olwandle. Ngakho, angiboni ukuthi okwamanje singazitshela ukuthi ilizwe lizavuka,” kutsho uMnu Mkhwebu.
“Umbuso okhona manje ulokhu usafana lokaMugabe lowana owobuqili, ubutsotsi, indluzula nani nani nenkani.”
UMnu Lebani Nkomazana laye uthi kuyamangalisa ukuthi okunengi okuhluphayo yikho okwakuthenjiswe nguhulumende kaMongameli Mnangagwa ukuthi uzokuguqula.
“Amathemba wonke ayatshabalala. Kuzocina njalo kusenza abanengi abaseZimbabwe ukubana bephume bayezama ngaphandle kwelizwe ukuze beziphilise njengoba impilo isinzima,” kutsho uNkomazana.
Inengi labeZimbabwe laba lithi ukusilela kwemali, ukuqansa kwentengo yempahla lokudla, ukusweleka kwemisebenzi lezomnotho ezilokhu zisehla, yikho okudlisa uzulu imbuya ngoluthi kanti njalo yikho okwabenza babaleka ekhaya.
