Ugatsha lwendaba zasekhaya kweleSouth Africa soluxwayise izizalwane zeZimbabwe ezedlula inkulungwane ezafaka izicelo zencwadi zokuhlala kulelolizwe ngokusemthethweni zisebenzisa amaphasipoti asephelelwe yisikhathi ukuthi zilethe amaphasipoti amatsha kungakedluli umhlaka 15 Mpalakazi 2018.
Luthi abazakwehluleka ukwenza lokhu, ngeke baphinde bazithole lezincwadi, ezaziwa ngesingisi ngokuthi ngamaZimbabwean Exemption Permits (ZEP).
Lolugatsha luthi ziphose zifike inkulungwane ezimbili, 1,932, izizalwane zeZimbabwe ezafaka izicelo zama-permits zisebenzisa amaphasipoti asephelelwe yisikhathi (expired).
Ugatsha lwasekhaya lolu lwethule isimemezelo lusithi imizamo yokuthintana labeZimbabwe laba ikhanya isehlula.
Umgcinisihlalo wenhlanganiso yeZimbabwe Community in South Africa uMnu Ngqabutho Mabhena, ongomunye wabasebenza gadalala ukuze ama-permits la atholakale, ukhuthaza izizalwane zeZimbabwe lezi ukuthi zitshelane ngaloludaba ukuze kungabi khona ovalelwa phandle kwaloluhlelo.
“Lokho kutsho ukuthi kulamaviki amabili kumbe amathathu ukuthi abantu bahambise amaphasipoti abo amatsha emahofisini eVFS. Thinake sinxusa wonke umuntu owa-aplayela ipermit esebenzisa iphasipoti endala ukuthi ahambe masinyane ayefaka iphasipoti yakhe entsha,” kutsho uMabhena.
Phakathi kwabantu abafaka izicelo zama-permits abaphose bafike izinkulungwane ezingamakhulu amabili, 180,188, iHome Affairs ithi isihluze ezingu 178, 172.
Ama-permits amanengi asethethwe ngabaniniwo, kanti amanye asabalindile eVFS. Amanye asaqediswa njalo azathunyelwa eVFS kungekudala.
Iziphathamandla zogatsha lwendaba zasekhaya zithi zizabe seziqedile ukulungisisa ama-permits la mhlaka 30 Lwezi 2018.
UMqondisi wenhlanganiso elwela amalungelo ezizalwane zeZimbabwe kweleSouth Africa eyePeace and Democracy Project uMnu Gilbert Moyo uthi bakhathazeke kakhulu ngokuthi sekuthethe umnyaka ukuthi ama-permits aphume kanti ukuphuza kwawo lokhu sekuthwalise nzima abanikazi bawo.
“Abanye bamiswe imisebenzi, abanye ama-bank ayavala ama account abo ngendaba yokuthi ama-permits awakaphumi. So siyathemba ukuthi yonke into izohamba kahle kodwa
silokwethuka ngoba asazi ukuthi yini ebenze bathatha isikhathi eside kangaka,” kutsho uMoyo.
Ama-permits la, abeqhubeka elokhu evuselelwa kusukela ngo 2010, asencede kakhulu izizalwane zeZimbabwe ebeziphila lokusebenza nzima ngenxa yokuba selizweni ngokungekho emthethweni.